हुम्लाका स्वास्थ्यचौकीमा सिटामोल अभावः बिरामी मर्कामा

नयाँ विकल्प
प्रकाशित मिती: २०७८ पुष १८, १३: ३०

सिमकोट । हुम्लाको सर्केगाड गाउँपालिका–४ स्थित साया स्वास्थ्यचौकीमा अत्यावश्यक औषधिको अभाव भएको छ । नेपाल सरकारले निःशुल्क वितरण गर्ने औषधि अभाव हुँदा यहाँका बिरामीहरु समस्यामा परेका छन्। स्वास्थ्यचौकीमा सामान्य सिटामोलसमेत नपाउने जनगुनासो बढेको छ ।
स्थानीयवासीहरुका अनुसार अहिले गाउँमा मौसमी ज्वरोका कारण अधिकांश बालबालिका र वृद्धवृद्धालाई बढी समस्या बनाएको छ ।
पछिल्लो समय मौसममा आएको परिवर्तनका कारण सो स्वास्थ्य संस्थामा ज्वरोका बिरामी बढेको स्वास्थ्यकर्मीहरु बताउँछन् ।

स्वास्थ्य चौकीका अनमी बिजौरा शाहीले यहाँ केही औषधि पसलहरुले सिटामोल आफ्नो नजिकको ग्राहकलाई दिन स्टक गरी राख्दा बजारमा उपलब्धता कम भएको बताइन् । यसरी स्टकमा राख्दा गाउँमा थप समस्या देखिएको उनको भनाई छ ।
त्यस्तै साया स्वास्थ्यचौकीका अहेब धर्मराज शाहीले औषधि अभाव हुँदा नागरिकको गाली आफूहरुले खानुपर्ने अवस्था आएको बताए। उपचारका लागि आएका बिरामीलाई औषधि छैन् भन्दा जानेबुझेका फिर्ता हुने गरे पनि नबुझेका केहीले गाली गर्ने गरेको बताए । औषधि अभाव हुँदा अहिले आफूहरुको काम कार्यालय खोल्ने र बन्द गर्ने मात्र भएको बताए ।

त्यस्तै सरकारीका निकाय औषधि तथा औषधिजन्य बस्तुहरुको लगाएतका व्यवस्थापनमा साह्रै कमजोर देखिएकाले जीवनरक्षक औषधिको अभाव भएको हुम्लाका स्थानीयहरुको आरोप छ । जीवनरक्षक सिटामोल जस्ता औषधिहरु स्वास्थ्य चौकीमा समेत नहुनु सरकारी निकायको उदासिनता भएको एक स्थानीयले बताए ।

त्यस्तै सर्केगाड गाउँपालिकाको काम गर्ने शैली, व्यवस्थापनमा दूरदर्शिता नभएकाले यस्तो समस्या देखा परेको स्वास्थ्यकर्मीको आरोप छ । सिटामोल जस्तो अत्यावश्यक औषधि नहुनुमा गाउँपालिकाले समयमै यसतर्फ ध्यान नदिनु मुख्य कारण भएको उनीहरुको भनाइ छ ।

त्यस्तै स्वास्थ्यचौकीमा अस्थायी साधनसँग सम्बन्धित पिल्स, सलायन, एमोक्सिलिनजस्ता औषधि नहुँदा थप समस्या बनाएको अनमी शाहीले बताइन् । हिउँदको समयमा दमका बिरामी स्वास्थ्यचौकीमा बढी आउने भएकाले दमरोगसंग सम्बन्धित औषधिहरुको समेत अभाव रहेको बताइन् ।