वैदेशिक रोजगारीका लागि कुवेत हिँडेका ११० जनालाई अध्यागमनले रोक्यो

नयाँ विकल्प संवाददाता
प्रकाशित मिती: २०८० असार २८, १४: ३४

काठमाडौँ। वैदेशिक रोजगारीका लागि कुवेत जान लागेका एक सय १० जनालाई त्रिभुवन अन्तराष्ट्रिय विमानस्थल अध्यागमन कार्यालयले विमानस्थलबाटै फर्काएको छ।

कार्यालयले बुधवार बेलुका वैदेशिक रोजगारीका लागि कुवेत जान लागेका नेपाली कामदारहरूले पेश गरेको कागजपत्र शङ्कास्पद देखिएको भन्दै अध्यागमन कार्यालयले कामदारहरूलाई प्रस्थान अनुमति नदिई फिर्ता पठाएको हो।

उनीहरूलाई दिएको पत्रमा अध्यागमन ऐन २०४९, अध्यागमन नियमावली २०५१ तथा अध्यागमन कार्यविधि २०६५ अनुसार पेस गरेको यात्रासँग सम्बन्धित कागजातहरू शङ्कास्पद देखिएको हुँदा प्रस्थान अनुमति नदिइएको अध्यागमन कार्यालयले जनाएको छ।

सलम एयरको उडानबाट मस्कट हुँदै कुवेत प्रस्थानका लागि अनुमति माग गरेका ती नेपालीहरु निर्धारित बोर्डिङ समयभन्दा ढिला गरी विमानस्थलको अध्यागमन कार्यालय आइपुगेकोले पनि प्रस्थान अनुमति नदिइएको अध्यागमनले जनाएको छ।

नेपाल वैदेशिक रोजगार व्यवसायी संघका अध्यक्ष राजेन्द्र भण्डारीले सम्पूर्ण प्रक्रिया पुरा गरेर जान लागेकाहरूलाई अध्यागमन कार्यालयले रोकेको बताए।