‘म हिमालयमा छु, जहाँ हिमाल पग्लिरहेछ’

सोलुखुम्बु पुगेर राष्ट्रसंघका महासचिव गुटेर्रेसले भने –

‘म हिमालयमा छु, जहाँ हिमाल पग्लिरहेछ’

नयाँ विकल्प संवाददाता
प्रकाशित मिती: २०८० कार्तिक १३, १६: ३९

काठमाडौं। संयुक्त राष्ट्रसंघका महासचिव एन्टोनियो गुटेर्रेसले जलवायु परिवर्तनको असरका रूपमा पर्यावरण र मानव समुदायमा नाटकीय परिवर्तन देखिन थालेको बताएका छन्।

विश्वको सर्वोच्च शिखर सगरमाथा क्षेत्रको अवलोकनका लागि सोमबार बिहान सोलुखुम्बु जिल्लाको खुम्बु पासाङल्हामु गाउँपालिका–४ पुगेका राष्ट्रसंघका महासचिव गुटेर्रेसले यस्तो बताएका हुन्।

उक्त क्षेत्रको अवलोकनका क्रममा सामाजिक सञ्जाल एप्समार्फत भिडियो सन्देश दिँदै महासचिव गुटेरेसले जलवायु परिवर्तन रोकथामका लागि विश्व समुदायलाई आग्रह गरेका छन्।

“म अहिले यहाँ हिमालयमा छु। जहाँ हिमाल पग्लिरहेका छन् र हिमनदीहरू रेकर्ड लेभलमा छन्। अन्टार्टिका र ग्रीनल्याण्डमा जस्तै यहाँ पनि जलवायु परिवर्तनको गम्भीर असर देखिइरहेका छन्”, गुटेर्रेसले भने, “हामीले बाढी पहिरो देख्नुपरेको छ। यहाँको समुदाय नाटकीयरूपमा प्रभावित भइरहेका छन्। हामीले यसलाई रोक्न जरुरी छ।”

जलवायु परिवर्तनका असरले हिमालय क्षेत्रको पर्यावरण र जनजीवनमा देखिन थालेका असर तथा त्यसको रोकथामका लागि आफूले विश्वसमुदायको ध्यानाकर्षण गराउन चाहेको उनले उल्लेख गरेका छन्।

“हामीले बढ्दो तापक्रम वृद्धिलाई एक दशमलव पाँच डिग्रीमा सीमित गर्नसक्नुपर्छ। यसबाट हामी पछि हट्न सक्दैनौँ”, उनले भिडियो सन्देशमार्फत् भनेका छन्।