कोभिडको नयाँ भेरियन्ट ‘केपी.१’ र ‘केपी.२’ नेपालमा भेटिन थाल्यो

नयाँ विकल्प
प्रकाशित मिती: २०८१ जेष्ठ ११, १६: ०२

काठमाडौं। नेपालमा पुनः कोभिड १९ को नयाँ भेरियन्ट देखिएको छ। स्वास्थ्य तथा जनसंख्या मन्त्रालयअन्तर्गतको राष्ट्रिय जनस्वास्थ्य प्रयोगशालामा हालै गरिएको जिनोमसिक्वेन्सिङमा कोभिड–१९ को नयाँ भेरिएन्ट ‘केपी १’ र ‘केपी २’ भेटिएको हो।

राष्ट्रिय प्रयोगशालाकाअनुसार पछिल्लो समय सिंगापुर,अमेरिकालगायत अफ्रिकी मुलुकमा देखिएको कोभिड–१९ को ओमिक्रोन भेरिएन्टको नयाँ सब–भेरिएन्ट ‘केपी.१’ र ‘केपी.२’ नेपालमा भेटिएको पुष्टि भएको छ।

हालै गरिएको ४२ कोभिड पोजेटिभ केसको जिनोमसिक्वेन्सिङ् गर्दा ४० प्रतिशतमा “केपी.१” र केपी.२ नेपालमा पुष्टि भएको प्रयोगशालाले जनाएको छ।

प्रयोगशालाका नमुनामा ओमिक्रोन (जेएन.१) २ नमुनामा, ओमिक्रोन (बीए.२), १२ नमुनामा, ओमिक्रोन (केपी.१) १७ नमुनामा, ओमिक्रोन (केपी.२) एक नमुनामा र ओमिक्रोन (केपी.३) (केपी.४) क्रमशः १ नमुनामा भेटिएको हो।

छिमेकी मुलुक भारत र चीनसहित विश्वका विभिन्न देशमा देखिएको कोभिड–१९ को नयाँ सब–भेरिएन्ट ‘जेएन.१’ नेपालमा पनि देखिएको थियो। तर, हाल विश्वमा महामारीको रूपमा देखिन थालेको नयाँ भेरिएन्ट ‘केपी.१’ र केपी.२ नेपालमा पुष्टि भएको छ।