एनएमबि बैंकले थप दुई जलविद्युतमा लगानी गर्दै

नयाँ विकल्प संवाददाता
प्रकाशित मिती: २०७८ पुष ६, ११: ४२

काठमाडौं । एनएमबि बैंकले १३ दशमलव ५ मेगावाट तथा १२ मेगावाटका जलविधुत आयोजनाहरुमा लगानीकर्ता भई वित्तीय व्यवस्थापन गरेको छ । बैंकले सुपर काबेली खोला– ‘ए’जलविद्युत् आयोजना तथा सुपर काबेली खोला क्यासकेड जलविद्युत् आयोजनाको मुख्य लगानीकर्ता भई वित्तीय व्यवस्थापन गरेको बताइएको छ ।

स्नो रिभर्स प्रालि तथा हिल्टन हाइड्रो इनर्जी प्रालिले ताप्लेजुङ जिल्लाको सिरिजंगा गाउँपालिकामाको सुपर काबेली खोला– ‘ए’ जलविद्युत् आयोजना तथा सुपर काबेली खोला क्यासकेड जलविद्युत् आयोजनाहरु निर्माण गरिरहेका छन् ।

यी आयोजनामा एनएमबि बैंकको नेतृत्वमा राष्ट्रिय वाणिज्य बैंकले सहवित्तीयकरण गरेको छ। १३ दशमलव ५ मेगावाट (सुपर काबेली खोला–‘ए’ जलविद्युत् आयोजना) तथा १२ मेगावाट (सुपर काबेली खोला क्यासकेड जलविद्युत् आयोजना) क्षमता भएको आयोजनाको कुल लागत क्रमशः २ अर्ब ४१ करोड तथा २ अर्ब १४ करोड रुपियाँ रहेको छ जसमध्ये बैंकहरुको लगानी क्रमशः। १ अर्ब ८९ करोड तथा १ अर्ब ६७ करोड रुपियाँ रहने छ ।

याेसंगै एनएमबि बैंकले कुल ४३ वटा जलविद्युत् आयोजनामा लगानी गरिसकेको छ ।