पार्टीबाट पनि ‘आउट’ भए शरीफ

नयाँ विकल्प
प्रकाशित मिती: २०७४ फाल्गुन १४, ०८: २६

पाकिस्तानको सर्वाेच्च अदालतको फैसला पछि प्रधानमन्त्रीबाट राजिनामा दिएका नवाज शरीफ पार्टीको नेतृत्व समेत अयोग्य ठहरिएका छन् । सर्वाेच्चले शरीफलाई पार्टीको नेतृत्व गर्न अयोग्य ठहर गरेको हो । पार्टी अध्यक्ष पदमा रहँदा नवाज शरीफले गरेका निर्णयहरु पनि अमान्य रहेको सर्वोच्चले ठहर गरेको छ । नवाज शरीफ सत्ताधारी पाकिस्तान मुस्लिम लीग–नवाज (पीएमएल–एन) का संस्थापक हुन् ।

पार्टीको अध्यक्ष पदमा अहिले उनी छन् । सर्वोच्चले पनामा पेपर लिक्स प्रकरणमा दोषी ठहर गर्दै सरकारको नेतृत्व गर्न अयोग्य रहेको फैसला गरेपछि गत वर्ष जुलाई महिनामा नवाज शरीफले प्रधानमन्त्री पद त्यागेका थिए । तर, उनले पार्टीको नेतृत्व भने त्यागेका थिएनन् । सर्वोच्चको पछिल्लो फैसलाले आगामी महिनामा हुन लागेको संसदीय चुनावलाई लिएर अनिश्चयको वातावरण बनेको बताइएको छ ।

शरीफले आफूविरुद्ध राजनीतिक षडयन्त्र भइरहेको दावी गर्दै आएका छन् । तल्लो सदन नेशनल एसेम्ब्लीमा नवाजको पार्टीको बहुमत छ । आगामी चुनावबाट पनि संसदमा उनकै पार्टीले बहुमत ल्याउने अनुमान गरिँदै आएको बेला सर्वोच्चको पछिल्लो फैसलाले आगामी चुनावलाई लिएर अन्यौलता बढेको छ ।