किपू क्रिकेट रङ्गशाला निर्माणय् ढिला जुयाच्वंगुबारे प्रधानमन्त्रीया गम्भीर च्यूता

नयाँ विकल्प संवाददाता
प्रकाशित मिती: २०८२ बैशाख २२, २१: १४

येँ : प्रधानमन्त्री केपी शर्मा ओलीं किपुली च्वंगु क्रिकेट रङ्गशाला निर्माण ढिला जुयाच्वंगु बारे गम्भीर च्यूता तयादीगु दु । रङ्गशालाय् अन्तरराष्ट्रियस्तरया प्यारापिट व फ्लडलाइट स्वायेगु ज्या क्वःछिनातःगु इलय् पूमवंगु विषयलय् थौं सम्बन्धित निकायया अधिकारी व निर्माण व्यवसायीतय्त सःताः वय्कलं सहलह यानादिल ।

प्रधानमन्त्री नापं मन्त्रिपरिषद्या ज्याकुथि, सिंहदरबारय् जूगु सहलहय् प्रधानमन्त्री ओलीं ज्या सुरु जुइधुंकूगुसां नं क्वःछिनातःगु इलय् ज्या पूमवंगु स्थितिप्रति गम्भीर च्यूता तयादिल । सहलहय् सहरी विकास मन्त्रालयया सचिव गोपालप्रसाद सिग्देल, उगु निर्माण ज्याया कार्यान्वयन निकाय सङ्घीय सचिवालय नापं व्यवस्थापन ज्याकुथिया प्रमुख चक्रवर्ती कण्ठलिसें सङ्लग्न निर्माण व्यवसायीतय्गु ब्वति दूगु खः ।

प्रधानमन्त्री ओलीं कार्यभार कःघायेधुंकाः वंगु असार ३१ गते न्हापांगु निर्णयकथं उगु सच्छिन्हु दुने उगु क्रिकेट ख्यलय् अन्तरराष्ट्रियस्तरया प्यारापिट व फ्लडलाइट तयेगु घोषणा यानादीगु खः । उगु क्वःछिनातःगु ई थ्व हे वैशाख २४ गते सिधयेत्यंगु दु । उगु निगू ज्याया निंतिं बिस्कंबिस्कं ठेकेदार कम्पनीतलिसे छसिंलाक वंगु पुस १९ व २२ गते सम्झौता जूगु खः ।

प्रधानमन्त्री ओलीं छु जुयाः इलय् हे ज्या पूमवन व आः ग्वःन्हुं गुणस्तरीय रूपं ज्या पूवनी धइगु सीकेत व वइगु निला दुने पूवंकेत कडा निर्देशन नं बियादिल । मन्त्रालयया सचिव, ज्याकुथिया प्रमुख व निर्माण व्यवसायीतय्सं सम्बन्धित निकायदथुइ समन्वय यायेत ई काःगुलिं बोलपत्र आव्हान याये लिबाःगु, प्राविधिक हुनिं डिजाइनय् सामान्य ह्यूपाः यायेमाःगु, वा वयाः छन्हुनिन्हु ज्या अवरोध जूगु, प्रतीत पौ अथे धइगु एलसी चायेकेगु प्रक्रिया लिबाःगु थेंजाःगु हुनिं क्वःछिनातःगु इलय् ज्या पूमवंगु स्वीकार यानादिल । आः वइगु लच्छिया दुने ज्या पूवनीगु वय्कःपिंसं प्रतिबद्धता प्वंकादिल ।

सहलहय् प्यारापिटपाखें वित्तीय प्रगति ४५.१९ व भौतिक प्रगति ५५ प्रतिशत व फ्लडलाइटपाखे वित्तीय प्रगति २३.८१ व भौतिकपाखे ३५ प्रतिशत प्रगति जूगु प्रधानमन्त्री ओलीयात जानकारी बियादिल । प्यारापिटया निंतिं ४९ क्वति २५ लख ६७ द्वः व ३०२ व फ्लडलाइटया निंतिं ४७ क्वति ३७ लख ६८ द्वः व ७७ ध्यबाय् थुगु सम्झौता जूगु खः ।

सहलहय् प्रधानमन्त्रीया मुख्य सल्लाहकार विष्णुप्रसाद रिमाल, नेपाल सरकारया मुख्यसचिव एकनारायण अर्याललिसें ब्वति कयादीगु खः ।

सम्बन्धित समाचार

एमाले भ्रष्टाचारीलाई जोगाउने पार्टी हो, तत्काल एकता सम्भव छैन : प्रचण्ड

२०८२ बैशाख २२, २१: १४

काठमाडौं : नेपाली कम्युनिस्ट पार्टीका संयोजक एवं पूर्वप्रधानमन्त्री पुष्पकमल दाहाल ‘प्रचण्ड’ले नेकपा (एमाले) सँग राष्ट्रिय मुद्दाहरूमा सहकार्य हुनसक्ने भएपनि तत्काल...