‘आर्थिक सुधारया ज्याझ्वःतय्त यक्व महत्व बियागु दु’

नयाँ विकल्प संवाददाता
प्रकाशित मिती: २०८२ बैशाख ३०, २१: १२

येँ : उपप्रधानमन्त्री नापं अर्थमन्त्री विष्णुप्रसाद पौडेलं देय्या मुक्कं आर्थिक सुधारयात सरकारं यक्व महत्व बियाः न्ह्याकाच्वंगु धयादीगु दु ।

वइगु आर्थिक दँया बजेटबारे विकास साझेदारलिसे थौं अर्थ मन्त्रालयकय् जूगु सहलहय् वय्कलं आर्थिक सुधारया प्रक्रिया न्ह्याकेधुंकूगु व उकियात भविष्यय् अझ प्रभावकारी जुइक न्ह्याकायंकेगु धयादिल । “छुं ईन्ह्यःनिसें आर्थिक सुधारया ज्या न्ह्याकागु दु । उकिं सकारात्मक लिच्वः बियाच्वंगु दु । भविष्यय् नं आर्थिक सुधारया ज्याझ्वःतय्त यक्व महत्व बिइगु जुइ”, वय्कलं धयादिल, “अध्यादेशपाखें जूगु कानुन संशोधन, उच्चस्तरीय आर्थिक सुधार सुझाव आयोगं ब्यूगु सुझाव, थी थी नीति व निर्णय नीतिगत सुधारया महत्वपूर्ण पक्षत खः ।”

अर्थमन्त्री पौडेलं वइगु बजेट विशेष यानाः निजी ख्यःयात हःपा बिइगु, रोजगारीया ह्वःताः सिर्जना यायेगु, उत्पादन नापं उत्पादकत्व वृद्धि यायेगु व राष्ट्रिय अर्थतन्त्रयात धिसिलाकेगुपाखे केन्द्रित जुइगु जानकारी बियादिल ।

स्रोत सुनिश्चिताया ल्याखं सुविधाजनक अवस्था मजूगु कनादिसें अर्थमन्त्री पौडेलं बजेट निर्माण यायेबलय् मितव्यितता, खर्च कटौती व सीमित साधन स्रोतयात यक्व लिच्व वइगु कथं विनियोजन यायेगुलिइ ध्यान बिइ धकाः धयादिल ।

“वैदेशिक ग्वाहालियात नेपाःया आवश्यकता व प्राथमिकताय् केन्द्रित यायेगु, उकिया पाय्छि व प्रभावकारी सदुपयोग यायेगुलिइ जिमिगु ध्यान केन्द्रित जुइ । पूँजीगत खर्च व उगु खर्च मजुइबलय्या समस्या ज्यंकेत नं ध्यान बियागु दु,” अर्थमन्त्री पौडेलं कनादिल ।

संसदय् न्ह्यब्वयेधुंकाः वइगु बजेटयात सकसिनं यथार्परक जू धकाः मूल्याङ्कन याइगु भलसा प्वंकादिसें अर्थमन्त्रीं देय्या विकासय् मित्रराष्ट्र व विकास साझेदारतय् मद्दिक ग्वाहालिया अपेक्षा सरकारं यानाच्वंगु धयादिल ।

अर्थ सचिव घनश्याम उपाध्यायं वइगु दँया बजेटं आर्थिक अनुशासन व निजी ख्यःया आत्मविश्वास वृद्धियात प्राथमिकताय् तयेगु धकाः धयादिल ।

अर्थ मन्त्रालयया अन्तरराष्ट्रिय आर्थिक ग्वाहालि समन्वय महाशाखा प्रमुख धनीराम शर्मां वंगु दँया तुलनाय् न्ह्यानाच्वंगु आर्थिक दँय् अर्थतन्त्र सुधारोन्मुख जूगु धयादिल ।

देय्या विकास साझेदार नापं इमि प्रतिनिधितय्सं राजस्व परिचालन, स्रोतया अधिकतम सदुपयोग, यथार्थपरक बजेट निर्माण व कार्यान्वयनलिसें विषयकय् सुझाव बियादिसें भविष्यय् नं नेपाःयात ग्वाहालि मद्दिक बियाच्वने धकाः प्रतिबद्धता प्वंकादिल ।

सहलहय् भारत, चीन, अमेरिका, बेलायत, जापान, कोरिया, अष्ट्रेलिया, नर्वे, जर्मनी, फिनल्याण्ड, युरोपेली सङ्घ, विश्व बैङ्क, एसियाली विकास बैङ्क, संयुक्त राष्ट्रसङ्घ, अन्तरराष्ट्रिय मुद्रा कोष, विश्व स्वास्थ्य सङ्गठनलिसें विकास साझेदारतय्गु ब्वति दूगु खः ।

सम्बन्धित समाचार

एमाले भ्रष्टाचारीलाई जोगाउने पार्टी हो, तत्काल एकता सम्भव छैन : प्रचण्ड

२०८२ बैशाख ३०, २१: १२

काठमाडौं : नेपाली कम्युनिस्ट पार्टीका संयोजक एवं पूर्वप्रधानमन्त्री पुष्पकमल दाहाल ‘प्रचण्ड’ले नेकपा (एमाले) सँग राष्ट्रिय मुद्दाहरूमा सहकार्य हुनसक्ने भएपनि तत्काल...