नेपाःमितय्त इजरायल व इरानं उद्धार यायेगु तयारी यानाच्वना : परराष्ट्रमन्त्री

नयाँ विकल्प संवाददाता
प्रकाशित मिती: २०८२ असार ६, २१: ४२

येँ, ९ तछलागा : परराष्ट्रमन्त्री डा आरजु राणा देउवां इजरायल व इरानय् विकसित परिस्थितिकथं अन च्वंपिं नेपाःया नागरिकतय्गु सुरक्षा व उद्धारया नितिं नेपाल सरकारं सम्भव जूगु दक्व उपायत नालीगु व नेपाः लिहाँवये मास्ति वःपिंत उद्धार यायेगु तयारी यानाच्वना धकाः धयादीगु दु ।

थौं परराष्ट्र मन्त्रालयकय् क्वचाःगु श्रम रोजगार नापं सामाजिक सुरक्षा, संस्कृति पर्यटन नापं नागरिक उड्डयन व गृह मन्त्रालयलिसेंया मंकाः बैठकय् मन्त्री डा राणां इजरायल व इरानय् न्ह्यानाच्वंगु युद्धं यानाः ब्वलंगु परिस्थिति व उकिया तयारीबारेया सहलहया झ्वलय् उगु जानकारी बियादीगु खः ।

मन्त्री डा राणां परराष्ट्र मन्त्रालयया समन्वयकय् इजरायलया नेपाःया दूतावासं सक्रिय जुयाः ज्या यानाच्वंगु, स्वदेश लिहाँवये मास्ति वःपिं नेपाःमितय् नितिं रजिष्ट्रेसन नं चाःगु व वय्कःपिं स्वदेश लिहाँवयेगु धाःसा उद्धारया नितिं उकिया प्रबन्धया तयारी सरकारं यानाच्वंगु जानकारी बियादिल ।

वय्कलं धयादिल, “जिटुजी प्रक्रियाअन्तर्गत इजरायल वंपिं नेपाःमित नेपाः लिहाँवयेगु वा सुरक्षित थासय् वनेगु धाःसा उकिया नितिं सहजीकरण यायेगु इजरायलया नं दायित्व खः । उकिया नितिं सीमालागापाखें मेमेगु मुलुकय् वनेत ग्वाहालि यायेत इजरायल सरकारयात इनाप यायेधुंकूगु दु । नेपाःमित स्वदेश लिहाँवये धाःसा वय्कःपिनिगु उद्धारया नितिं नेपाल सरकार तयारी अवस्थाय् हे च्वनाच्वंगु दु ।”

उगु बैठकय् श्रममन्त्री शरद्सिंह भण्डारीं मन्त्रालय नं अन च्वंपिं नेपाःमितलिसे मद्दिक सम्पर्कय् च्वनाच्वंगु व वय्कःपिं स्वदेश लिहाँवये धाःसा उद्धारया तयारीइ नेपाल सरकार वनेमाः धकाः धयादिल । वय्कलं आः इजरायल वनेगु अन्तिम तयारीइ दुपिंत श्रम स्वीकृति मब्यूसे दिकूगु खँ नं कनादिल ।

थ्व हे जुन १३ य् इजरायल व इरानदथुइ युद्ध सुरु जूगु हे न्हुकुन्हु परराष्ट्र मन्त्रालयं विज्ञप्तिपाखें निगुलिं पक्षयात फयांफक्व संयमता जुयाच्वनेत वार्तापाखें समस्या ज्यंकेत अपिल यासें उगु मुलुकय् च्वंपिं नेपाःमितय्त सम्बन्धित नेपाःया राजदूतावासलिसे सम्पर्कय् च्वनाच्वनेत इनाप याःगु खः ।

अनंलिपा जुन १५ य् सम्पर्क धलःलिसेंया ट्राभल एड्भाइजरी पिकयाः सुरक्षाया दृष्टिकोणं फयांफक्व यक्व सतर्क जुयाच्वनेत नेपाःमितय्त इनाप याःगु खः । उगु मुलुकय् आः हवाई मार्ग बन्द जूगु अवस्थाय् सुरक्षित थाय् वा सीमावर्ती मुलुकय् वने धाःपिं नेपाःमितय्त ‘अनलाइन भिसा’ उपलब्ध याकेगुलिसेंया ज्याय् सहजीकरण यानाबीत खाडीइ च्वंगु दक्व नेपाःया नियोगतय्त परराष्ट्र मन्त्रालयं वंगु बुधबाः हे निर्देशन बिइधुंकूगु खः ।

लिसें मन्त्रालयं अनलाइन पोर्टल चायेकाः नेपाःमितय्गु धलः कायेगु न्ह्याकूगु व उगु पोर्टलय् आःतक ६०० म्ह स्वयां अप्वसिनं विवरण दर्ता नं यायेधुंकूगु दु । थ्व ज्या न्ह्यानाच्वंगु हे दु । परराष्ट्र मन्त्रालयं वंगु बुधबाः हे निक्वखुसी ट्राभल एड्भाइजरी पिकयाः आः इजरायल व इरानय् च्वनाच्वंपिं नेपाःया नागरिकतय्त सुरक्षाया दृष्टिकोणं फयांफक्व यक्व सतर्क जुयाच्वनेत व नेपाःपाखें इजरायल वा मध्यपूर्वया मेमेगु मुलुकया भ्रमण मयायेत इनाप नं याःगु खः ।

थ्व हे वालय् नेपाःया नितिं इजरायलया राजदूत स्मुलिक आरी बासलिसे परराष्ट्रमन्त्री डा राणां नापलानाः नेपाःया नागरिकतय्गु सुरक्षाया पाय्छिगु प्रबन्ध मिले यायेत इजरायल सरकारयात इनाप यानादीगु खः ।

अथे हे, इजरायलय् च्वंगु नेपाःया राजदूतावास व इरान स्वइगु कतारय् च्वंगु नेपाःया राजदूतावासयात सम्बन्धित सरकारी अधिकारी, थ्व लागाय् ज्या याइगु सङ्घसंस्था व नेपाःया समुदायलिसे लिक्क जुयाः सम्पर्क स्थापित यायेत व उकिया सम्बन्धय् मन्त्रालययात ‘रियल टाइम रिपोर्टिङ’ यायेत निर्देशन बिइधुंकूगु खः । आः इजरायलय् न्याद्वः व ५०० निसें न्हय्सः नेपाःमि दूगु व उपिंमध्ये अप्वः धइथें तेल अबिब, जेरुसेलम व हाइफाय् च्वनाच्वंगु दु । अथे हे इरानय् १८ म्ह नेपाःमित दु ।

सम्बन्धित समाचार

एमाले भ्रष्टाचारीलाई जोगाउने पार्टी हो, तत्काल एकता सम्भव छैन : प्रचण्ड

२०८२ असार ६, २१: ४२

काठमाडौं : नेपाली कम्युनिस्ट पार्टीका संयोजक एवं पूर्वप्रधानमन्त्री पुष्पकमल दाहाल ‘प्रचण्ड’ले नेकपा (एमाले) सँग राष्ट्रिय मुद्दाहरूमा सहकार्य हुनसक्ने भएपनि तत्काल...