कलाकारसभसँ सभामुख घिमिरेक अन्तरक्रिया

नयाँ विकल्प संवाददाता
प्रकाशित मिती: २०८२ श्रावण ४, २१: १४

काठमाण्डू : प्रतिनिधिसभाक सभामुख देवराज घिमिरे ‘इन्ट्रा नेसनल वेलफेयर एन्ड सपोर्ट फाउन्डेसन अफ अमेरिका’क आयोजनामे सञ्चालित पहिल अन्तर्राष्ट्रीय नेपाली रियालिटी शो ‘हमर भ्वाइस युनिभर्स’ आ ‘हमर डान्स युनिभर्स’क कलाकारसभसँ अन्तरक्रिया केलैन अइछ।

कार्यक्रममे सभामुख घिमिरे कहलैन ”‘हाम्रो भ्वाइस युनिभर्स’ आ ‘हाम्रो डान्स युनिभर्स’ जकाँ सांस्कृतिक कार्यक्रमसभ विश्वभैर पसरल नेपाली समुदायक कला, संस्कृति आ प्रतिभाकेँ अन्तर्राष्ट्रीय स्तरपर उजागर करबामे महत्वपूर्ण योगदान देलक अइछ।

ओ कहलैन, “एहन कार्यक्रमसभ नेपाली भाषा, संस्कार आ सङ्गीतकेँ प्रवासमे मात्र नै, विश्व मञ्चपर सेहो पहिचान दिएबाक अवसर प्रदान कएलक अइछ।” नवका पीढ़ीमे नेपाली भाषा आ सांस्कृतिक गाैरवके भावना जागृत करबामे एहन सिर्जनात्मक प्रयास प्रभावकारी होएबाक विश्वास व्यक्त करैत ओ कहलैन, “प्रवासमे रइह रहल नेपालीक सामाजिक एकता, सांस्कृतिक संरक्षण आ देशक विकासमे होएबला योगदानक उच्च मूल्याङ्कन करबाक चाही।”

इन्ट्रा नेसनल वेलफेयर एन्ड सपोर्ट फाउन्डेसन अफ अमेरिकाक कार्यकारी निर्देशक चुणामणि भट्टराई जानकारी देलैन जे दक्षिण अफ्रिका आ अन्टार्कटिका छोइड़ संसारभैरक नेपालीसभ ई अभियानसँ प्रत्यक्ष वा अप्रत्यक्ष रूपसँ जुड़ल छैथ। ओ कहलैन, “लगभग ६० देशक नेपालीसभ एहिमे योगदान कएने छैथ। ताहि देशक नेपाली मूलक कलाकार नेपाल आएल छल। एखनो ७ देशक कलाकार उत्कृष्ट १० भितर चयनित भेल छैथ।”

सार्वजनिक सेवा प्रसारण संस्था (पीएसबी) क सञ्चालक सदस्य फुलमान बल कहलैन जे दुनू रियालिटी शो सांस्कृतिक आ राष्ट्रियता बीचक सम्बन्धकेँ जोड़बामे सफल भेल अइछ।

इन्ट्रा फाउन्डेसनक नेपाल च्याप्टर अध्यक्ष बाबुकृष्ण कार्की कहलैन जे दुनू रियालिटी शो मार्फत विश्वभैर रहल नेपाली समुदायक कला, प्रतिभा आ सांस्कृतिक सम्पदाकेँ अन्तर्राष्ट्रीय स्तरधैर पहुँचाबक उद्देश्यमे सफलता प्राप्त भेल अइछ।

कार्यक्रममे दुनू रियालिटी शोमे उत्कृष्ट १०मे रहल सफल कलाकार, प्रशिक्षक, कोरियोग्राफर सहित ४०सँ बेसी प्रतिनिधि सहभागी छल।