बिपीक विचार नेपालक लेल मात्र नै, विश्वक लेल सान्दर्भिक अइछ: डा. कोइराला

नयाँ विकल्प संवाददाता
प्रकाशित मिती: २०८२ श्रावण ६, २१: २३

काठमाण्डू : नेपाली कांग्रेसक नेता डा. शेखर कोइराला जननायक बिपी कोइरालाक प्रजातान्त्रिक समाजवादक विचार नेपालमे मात्र नै, विश्वक लेल सेहो सान्दर्भिक रहल बताैलैन अइछ।

बिपी कोइरालाक ४३अम स्मृति दिवसक अवसरमे आइ बिपी स्मृति अस्पताल, बिपी स्मृति प्रतिष्ठान आ कांग्रेसक खेलकुद विभागद्वारा संयुक्त रूपसँ आयोजित ‘देश विकास आ देशवासीक उन्नतिक आधार बिपी’ विषयक अन्तर्क्रियामे ओ बिपीक विचारपर एखन देश आगू बइढ़ रहल अइछ से बताैलैन।

“बिपीक विचारकेँ कांग्रेस छोइड़ देलक से चारू कात सुनल जाइत छै, मुदा कांग्रेस बिपीक विचार नै छोड़ने छै, आइयो देश बिपीक प्रजातान्त्रिक समाजवादपर आगू बढ़ल अइछ”, ओ कहलैन। डा. कोइराला बिपी कोइरालाक अन्तर्राष्ट्रीय छवि नीक रहल बताैलैन।

स्वास्थ्य तथा जनसङ्ख्यामन्त्री प्रदीप पौडेल नेपालक लोकतान्त्रिक राजनीतिकके जग बिपी कोइराला निर्माण केलैन से कहलैन। नेपाली समाजवादक आधार आ बहुदलवाद बिपी कोइरालाद्वारा सुरू भेल हुनकर कहब छल।

युवा तथा खेलकुदमन्त्री तेजुलाल चौधरी बिपीक विचारकेँ आत्मसात् क आगू बढ़लापर मात्र देश विकास गति लेत से बताैलैन। बिपी स्मृति अस्पतालक अध्यक्ष उमेशजङ्ग रायमाझी नेपालक राष्ट्रनायक बिपी कोइराला रहल बताैलैन। ओ बिपी कोइरालाकेँ शिक्षा, स्वास्थ्य, साहित्य सहितक क्षेत्रसँ सदैव स्मरण करैत आएल उल्लेख केलैन।