पश्चिमी न्यून चापीय प्रणालीको प्रभाव: पहाडी क्षेत्रमा वर्षा र चट्याङको सम्भावना, तराईमा अत्यधिक गर्मी बढ्ने

नयाँ विकल्प
प्रकाशित मिती: २०८३ जेष्ठ २४, ०७: ५२

काठमाडौँ । देशको उपल्लो वायुमण्डलमा सक्रिय पश्चिमी न्यून चापीय रेखा तथा स्थानीय वायुको आंशिक प्रभावका कारण देशका विभिन्न क्षेत्रमा बदली, वर्षा तथा चट्याङको सम्भावना रहेको छ।

जल तथा मौसम पूर्वानुमान महाशाखाका अनुसार हाल लुम्बिनी, कर्णाली र सुदूरपश्चिम प्रदेशसहित अधिकांश हिमाली तथा पहाडी क्षेत्रमा सामान्यदेखि आंशिक बदली रहेको छ भने तराईका भूभागमा आंशिक बदली रहेको छ। बागमती, गण्डकी, लुम्बिनी, कर्णाली र सुदूरपश्चिम प्रदेशका एक–दुई स्थानमा मेघगर्जन तथा चट्याङसहित हल्का वर्षा भइरहेको छ।

महाशाखाले आज दिउँसो कोशी प्रदेशसहित हिमाली क्षेत्रमा सामान्य बदली रहने तथा मधेस प्रदेशसहित अन्य पहाडी क्षेत्रमा आंशिक बदली रहने जनाएको छ। तराईका अधिकांश भूभागमा भने मौसम मुख्यतया सफा रहने अनुमान गरिएको छ।

कोशी प्रदेशका केही स्थान तथा बागमती र गण्डकी प्रदेशका हिमाली तथा पहाडी क्षेत्रमा मेघगर्जन र चट्याङसहित मध्यम वर्षाको सम्भावना रहेको छ। साथै, मधेस प्रदेशसहित अन्य हिमाली क्षेत्रका एक–दुई स्थानमा वर्षा तथा हिमपात हुन सक्ने महाशाखाको प्रक्षेपण छ।

यता, मधेस, बागमती, गण्डकी, लुम्बिनी र सुदूरपश्चिम प्रदेशका तराई क्षेत्रका केही स्थानमा तापक्रम अनपेक्षित रूपमा बढ्न सक्ने भएकाले गर्मीको प्रभावबाट बच्न आवश्यक सतर्कता अपनाउन आग्रह गरिएको छ।

आज राति पनि कोशी प्रदेशसहित हिमाली क्षेत्रमा सामान्य बदली तथा मधेस प्रदेश र अन्य पहाडी क्षेत्रमा आंशिक बदली रहनेछ। तराईका अधिकांश भूभागमा मौसम मुख्यतया सफा रहने अनुमान छ।

कोशी प्रदेशका केही तथा मधेस, बागमती र गण्डकी प्रदेशका हिमाली तथा पहाडी क्षेत्रका एक–दुई स्थानमा मेघगर्जन तथा चट्याङसहित हल्का वर्षा वा हिमपात हुन सक्ने महाशाखाले जनाएको छ।

महाशाखाले विशेषगरी मधेस, बागमती, गण्डकी, लुम्बिनी र सुदूरपश्चिम प्रदेशका तराई क्षेत्रमा तापक्रम बढ्न सक्ने भएकाले आवश्यक सावधानी अपनाउन र मौसमसम्बन्धी अद्यावधिक सूचनामा ध्यान दिन सर्वसाधारणलाई अनुरोध गरेको छ।

सम्बन्धित समाचार

सामाजिक सद्भाव खलबलिने कुनै पनि कार्यमा संलग्न नहुन कांग्रेसको आग्रह

२०८३ जेष्ठ २४, ०७: ५२

काठमाडौं : नेपाली कांग्रेसले सुनसरीको देवानगञ्ज र कप्तानगञ्जमा भएका दुःखद घटना र त्यसपछिको तनावपूर्ण परिस्थितिप्रति गम्भीर चिन्ता व्यक्त गर्दै सामाजिक...