काठमाडौँ महानगरको २५ अर्ब ८८ करोडभन्दा बढीको बजेट सर्वसम्मत पारित

नयाँ विकल्प
प्रकाशित मिती: २०८३ असार १८, ०८: ५२

काठमाडौँ । काठमाडौँ महानगरपालिकाको आर्थिक वर्ष २०८३/०८४ का लागि प्रस्तुत ‘कार्यक्रम तथा बजेट’, ‘आर्थिक विधेयक’ र ‘विनियोजन विधेयक’ नगर सभाबाट सर्वसम्मत रूपमा पारित भएको छ ।

असार ४ गते सुरु भएको नगर सभा–१९ को चौथो बैठकमा कार्यवाहक प्रमुख सुनिता डंगोलले पेश गरेको २५ अर्ब ८८ करोड ३० लाख ५५ हजार रुपैयाँ बराबरको बजेट तथा कार्यक्रम राष्ट्रिय सभा गृहमा आज बसेको बैठकबाट सर्वसम्मत रूपमा अनुमोदन गरिएको हो ।

पारित बजेटमध्ये २५ अर्ब १३ करोड ३० लाख ५५ हजार रुपैयाँ सञ्चित कोषमार्फत व्ययभार हुने तथा ७५ करोड रुपैयाँ बाह्य व्ययभारतर्फ विनियोजन गरिएको महानगरपालिकाले जनाएको छ ।

बैठकमा प्राप्त संशोधन प्रस्ताव र सुझावलाई समेट्दै सभाका अध्यक्षले निर्णयका लागि प्रस्तुत गरेको प्रस्ताव नगर सभा सदस्यहरूले सर्वसम्मत रूपमा पारित गरेका हुन् ।

यसैबीच, विधायन समितिका संयोजक तथा वडा नं. २३ का अध्यक्ष मचाराजा महर्जनले विभिन्न ऐन संशोधनसम्बन्धी प्रस्ताव सभामा पेश गरेका छन् । उनले ‘जनस्वास्थ्य ऐन २०८० को पहिलो संशोधन २०८३’, ‘शिक्षा ऐन २०७५ को दोस्रो संशोधन २०८३’, ‘विवाद निरुपण (कार्यविधि) ऐन २०७५ को पहिलो संशोधन २०८३’, ‘विपद् व्यवस्थापन ऐन २०७७ को पहिलो संशोधन २०८३’ तथा ‘कर्मचारी सेवा ऐन २०७७ को चौथो संशोधन २०८३’ पेश गरेका हुन् ।

उक्त ऐन संशोधन प्रस्ताव तथा अन्य विषयमाथि थप छलफल गर्न नगर सभाको पाँचौँ बैठक असार २३ गते मंगलबार दिउँसो ३ बजे बस्ने महानगरपालिकाले जनाएको छ ।