काङ्ग्रेसले सिद्धान्तमा सम्झौता गर्दैन , विगतका गल्ती दोहर्याउदैनैाँ – सभापति थापा

ललितपुर ।    नेपाली कांग्रेस ललितपुरद्वारा आयोजित ४४ औँ वि.पी. स्मृति सप्ताह प्रारम्भको अवसरमा “नयाँ पुस्तासँग नेपाली कांग्रेसका सभापति” साक्षात्कार कार्यक्रम तथा नेपाली कांग्रेस जिल्ला कार्यालय, ललितपुरको प्राङ्गणमा निर्मित सन्त नेता कृष्णप्रसाद भट्टराईको सालिक अनावरण समारोह नेपाली कांग्रेसका सभापति गगनकुमार थापाको प्रमुख आतिथ्यता सम्पन्न भएको छ । बागमती प्रदेश सरकारका माननीय मुख्यमन्त्री तथा नेपाली कांग्रेस बागमती प्रदेश सभापति इन्द्रबहादुर बानियाँको विशेष आतिथ्यता तथा नेपाली कांग्रेसका सहमहामन्त्रीद्वय उदय शमशेर राणा र मुक्ता यादवको विशेष आतिथ्यतामा सम्पन्न कार्यक्रममा ललितपुर जिल्लाका नेता तथा कार्यकर्ताहरुको उल्लेखनीय उपस्थिति रहेको थियो ।

उक्त कार्यक्रमलाई सम्बोधन गर्दै नेपाली कांग्रेसका सभापति गगनकुमार थापाले पछिल्लो समय नेपाली राजनीतिमा मौलाउँदै गएको सत्ता–केन्द्रित प्रवृत्तिले राजनीतिक दलहरूको विश्वसनीयता र जनविश्वासमा गम्भीर क्षति पुगेको बताए । उनले बिहानसम्म सत्तापक्षमा रहेको दल भोलिपल्ट प्रतिपक्षमा पुग्ने र प्रतिपक्षमा रहेको दल एकाएक सत्तापक्ष बन्ने राजनीतिक प्रवृत्तिले लोकतन्त्रको मूल मर्ममाथि नै प्रश्न उठाएको उल्लेख गरे ।
सभापति थापाले भने “सत्ता नै सबै कुरा हो भन्ने मान्यताले गर्दा नेपाली कांग्रेससहितका पुराना दलहरूले अहिले ठूलो मूल्य चुकाउनु परिरहेको छ। जनताले राजनीतिक दललाई केवल सरकार बनाउन होइन, लोकतान्त्रिक मूल्य, सिद्धान्त र जनताको हितको रक्षाका लागि मत दिएका हुन्छन्।”

उनले चुनावी गठबन्धन र सत्ता समीकरणमा देखिएको अस्थिरताका कारण राजनीतिक दलहरूको वैचारिक पहिचान नै संकटमा परेको उल्लेख गर्दै अब राजनीतिक दलहरूले सरकार गठन र सत्ता टिकाउने खेलमा मात्र सीमित नरही नागरिकको मतादेश र लोकतान्त्रिक मूल्य–मान्यताप्रति इमानदार हुनुपर्नेमा जोड दिए ।

प्रदेश सरकारको सन्दर्भमा उठेका विभिन्न प्रश्नहरूको जवाफ दिँदै सभापति थापाले भने “प्रदेश सरकारको सन्दर्भमा धेरैले हाम्रो भूमिका के हुन्छ भनेर सोध्नुहुन्छ । परिणाम जे भए पनि नेपाली कांग्रेसले सिद्धान्तमा सम्झौता गर्दैन। विगतका गल्ती दोहोर्‍याउँदैनौँ। तीन दल मिलेर प्रदेश सरकार बनाउने प्रस्ताव जनादेशविपरीत भएकाले हामीले अस्वीकार गरेका छौँ।”

तीन दल मिलेर सरकार गठन गर्नु भनेको प्रदेशसभालाई प्रतिपक्षविहीन बनाउनु सरह हुने उल्लेख गर्दै उनले लोकतन्त्रको सुदृढीकरणका लागि सरकार जति बलियो हुनुपर्छ, त्यत्तिकै प्रभावकारी र सशक्त प्रतिपक्ष पनि आवश्यक रहेको धारणा व्यक्त गरे । थापाले सरकारमा सहभागी हुनु मात्र नेपाली कांग्रेसको उद्देश्य नरहेको स्पष्ट पार्दै जनताको विश्वास, सिद्धान्त र लोकतान्त्रिक मूल्य–मान्यताको संरक्षण नै पार्टीको मूल दायित्व भएको बताउनुभयो।
सभापति थापाले चुनावअघि एक दलसँग गठबन्धन गर्ने र चुनावपछि अर्कै दलसँग सरकार बनाउने प्रवृत्तिका कारण सरकार र प्रतिपक्षको भूमिकामा अन्योल सिर्जना भएको उल्लेख गर्दै “अब जनादेशको सम्मान गर्दै सिद्धान्त र लोकतान्त्रिक मूल्यका आधारमा राजनीति अघि बढ्नुपर्छ। जनताले दिएको मतको सम्मान गर्नु नै लोकतन्त्रप्रतिको सच्चा सम्मान हो।”

कार्यक्रमको अर्को महत्वपूर्ण आकर्षण नेपाली कांग्रेस जिल्ला कार्यालय, ललितपुरको प्राङ्गणमा निर्मित सन्त नेता कृष्णप्रसाद भट्टराईको सालिक अनावरण समारोह रहेको थियो। नेपाली राजनीतिमा सादगी, नैतिकता, त्याग र लोकतान्त्रिक संस्कारका अनुपम उदाहरण सन्त नेता भट्टराईको योगदानलाई स्मरण गर्दै भट्टराईको सालिक अनावरण गरिएको हो। भट्टराईले स्थापित गरेका राजनीतिक संस्कार र सार्वजनिक जीवनमा अपनाएको नैतिक आदर्श आजको पुस्ताका लागि प्रेरणाको स्रोत रहेको वक्ताहरूले बताएका थिए।

त्यसैगरी, “नयाँ पुस्तासँग नेपाली कांग्रेसका सभापति” विषयक साक्षात्कार कार्यक्रममा युवा पुस्ताले लोकतन्त्र, सुशासन, रोजगारी, शिक्षा, समकालीन राजनीति तथा नेपाली कांग्रेसको भावी कार्यदिशासम्बन्धी विविध जिज्ञासाहरू राखेका थिए। सभापति थापाले नयाँ पुस्ताको अपेक्षा अनुरूप नेपाली कांग्रेसलाई वैचारिक रूपमा अझ सशक्त, जनउत्तरदायी र समयसापेक्ष बनाउँदै लैजाने प्रतिबद्धता व्यक्त गरेका छन । उनले लोकतन्त्रको भविष्य युवाहरूको सक्रिय सहभागिता र राजनीतिक चेतनासँग जोडिएको उल्लेख गर्दै राष्ट्र निर्माणको अभियानमा नयाँ पुस्ताको नेतृत्वदायी भूमिका अपरिहार्य रहेको धारणा राखे ।

४४ औँ वि.पी. स्मृति सप्ताहको प्रारम्भसँगै आयोजित यस कार्यक्रमले वि.पी. कोइरालाको राष्ट्रियता, प्रजातन्त्र र समाजवादको सिद्धान्त, सन्त नेता कृष्णप्रसाद भट्टराईको नैतिक राजनीतिक आदर्श तथा नयाँ पुस्ताको लोकतान्त्रिक आकाङ्क्षाबीच सशक्त सेतु निर्माण गरेको विश्वास व्यक्त गरिएको छ। कार्यक्रमले नेपाली कांग्रेसलाई वैचारिक रूपमा थप सुदृढ बनाउनुका साथै लोकतान्त्रिक मूल्य–मान्यताप्रति युवापुस्ताको आकर्षण अभिवृद्धि गर्न महत्वपूर्ण योगदान पुर्‍याएको सहभागीहरूको भनाइ रहेको छ।

कार्यक्रममा नेपाली कांग्रेसका केन्द्रीय सदस्यहरू, प्रदेश तथा जिल्ला तहका पदाधिकारीहरू, जनप्रतिनिधिहरू, भ्रातृ एवं शुभेच्छुक संस्थाका प्रतिनिधिहरू, युवा तथा विद्यार्थीहरूको उल्लेखनीय उपस्थिति रहेको  उक्त   कार्यक्रम नेपाली    कांग्रेसका जिल्ला  सभापति जितेन्द्र  श्रेष्ठ को सभापतित्वमा र संचालन जिल्ला  सचिव  वशिष्ठ अधिकारीले   गरेका  थिए ।

सम्बन्धित समाचार

लिग-२ मा नेपालको खराब प्रदर्शन

• २०८३ श्रावण ३, १२: ०५

काठमाडौं : आईसीसी पुरुष विश्वकप क्रिकेट लिग–२ अन्तर्गत सोमबार भएको निकै प्रतिस्पर्धात्मक खेलमा नेपाल नामिबियासँग पराजित भएको छ । नेदरल्यान्ड्सको...

आजका लागि विदेशी मुद्राको विनिमयदर

• २०८३ श्रावण ३, १२: ०५

काठमाडौं : नेपाल राष्ट्र बैंकले आजका लागि विदेशी मुद्राको विनिमयदर निर्धारण गरेको छ । राष्ट्र बैंकका अनुसार अमेरिकी डलर एकको...

डा. गाेविन्द केसी र सरकारबीच ७ बुँदे सहमति, अनशन तोडियो

• २०८३ श्रावण ३, १२: ०५

काठमाडौं : डा. गाेविन्द केसी र सरकारबीच ७ बुँदे सहमति भएकाे छ । साेमबार सरकारसँग सहमति भएसँगै डा.केसीले अनशन ताडेका...