लुम्बिनीमा विश्वासको मत पाउने नपाउने टुंगो नलाग्दै विपक्षी गठबन्धनद्धारा ८–८ महिना सरकारको नेतृत्व गर्ने सहमति

नयाँ विकल्प,

काठमाडौं – विश्वासको मत पाउने नपाउने टुंगो नलाग्दै लुम्बिनी प्रदेशमा विपक्ष गठबन्धनले आठ-आठ महिना सरकारको नेतृत्व गर्ने समझदारी गरेका छन् ।

तर, विपक्षी गठबन्धन नेपाली कांग्रेस र माओवादी केन्द्रका सांसदले सरकार नेतृत्व गर्ने समझादारी गरेपनि लिखित सहमति भएको छैन ।

मुख्यमन्त्री शंकर पोखरेलविरुद्ध प्रदेशसभामा दर्ता गरेको अविश्वास प्रस्तावमाथि छलफलका लागि साउन २७ गते विशेष अधिवेशन बोलाइएको छ ।

मुख्यमन्त्रीविरुद्धको अविश्वास प्रस्ताव पारित भई विपक्षी गठवन्धनको सरकार बनेमा त्यसको आयू करिब १६ महिनाको हुनेछ ।

साउन २७ गते अविश्वास प्रस्तावमाथि छलफलका लागि बोलाइएको विशेष अधिवेशन नजिकिँदै गर्दा विपक्षी गठबन्धनका सांसदलाई रिसोर्टमा राखिएको छ ।

विशेष अधिवेशनमा कसरी प्रस्तुत हुने भन्ने रणनीति तय गर्न विपक्षी चार दल कांग्रेस, माओवादी केन्द्र,जसपा र राष्ट्रिय जनमोर्चाका सांसदहरुबीच कपिलवस्तुको बाणगंगास्थित राजापानी थारु भिलेजमा छलफल हुने कार्यक्रम रहेको बताइएको छ ।

८० प्रदेश सभामा सांसदमध्ये एमालेका ३८ जना सांसद छन् भने मुख्यमन्त्रीले विश्वासको मत पाउन पक्षमा ४१ मत चाहिन्छ ।

विपक्षी गठबन्धनमा रहेका दल नेपाली कांग्रेसका १९, नेकपा माओवादी केन्द्रका १८, जनता समाजवादी पार्टीका ३ र राष्ट्रिय जनमोर्चाका एक जना गरी ४१ जना सांसद रहेका छन् ।