अस्पतालको शैष्याबाटै नेकपा एकीकृत समाजवादी पार्टीमा रहने झलनाथको घोषणा

नयाँ विकल्प,

काठमाडौं – पूर्व प्रधानमन्त्री झलनाथ खनालले अस्पतालको शैष्याबाटै माधव नेपाल पक्षले विहिबार दर्ता गराएको पार्टीमा रहने जानकारी दिएका छन् ।

आज विज्ञप्ति जारी गर्दै नेता खनालले कम्युनिष्ट पार्टी एकीकृत समाजवादी (नेकपा एकीकृत समाजवादी) पार्टीमा रहेको बताएका हुन् ।

एमालेभित्रै एकताको कुरा गरिरहँदा खनालले भने आफू माधव नेपालको पार्टीमा भएको बताए ।

एमालेबाट विभाजित भई बनेको नेकपा एकीकृत समाजवादी पार्टीमा झलनाथ खनालको नाम वरिष्ठ नेतामा रहेको छ । हाल दिल्लीस्थित एपोलो अस्पतालमा उपचाररत खनाल नयाँ पार्टी बनेपनि मौन बस्दै आएका थिए ।

एमाले संस्थापनले नयाँ पार्टीमा खनालको संलग्नता नरहेको दावी गर्दै आएका बेला खनालले नयाँ पार्टीलाई आफ्नो साथ र समर्थन रहेको औपचारिक रुपमा उल्लेख गरेका छन् ।

खनालको सचिवालयले नयाँ पार्टीलाई एमालेका पूर्वअध्यक्ष समेत रहेका उनको साथ र समर्थन रहेको स्पष्ट पारेको हो ।

‘भारतको नयाँदिल्लीस्थित एपोलो हस्पिटलमा उपचाररत पूर्व प्रधानमन्त्री झलनाथ खनालज्यू नयाँ दर्ता भएको नेपाल कम्युनिष्ट पार्टी (एकीकृत समाजवादी) को साथ र समर्थनमा रहनुभएको सम्पूर्णमा जानकारी गराउँदछौं ।’ खनालको आधिकारिक फेसबुकमा सचिवालयले लेखेको छ,

माधव नेपालको नेतृत्वमा नेकपा समाजवादी पार्टीले आजै निर्वाचन आयोगमा दर्ताका लागि निवेदन दिएको छ ।

उनी समूहमा रहेका सुरेन्द्र पाण्डे, गोकर्ण विष्ट, भीम आचार्य, ठाकुर गैरे लगायतका नेता भने नेपालले गठन गरेको पार्टीमा गएका छैनन् ।