मन्त्रिपरिषद् विस्तार गर्न ढिलाई भएको कांग्रेस नेता निधि, कोइराला र सिंहको निष्कर्ष

नयाँ विकल्प,

काठमाडौं– सत्तारुढ दल नेपाली कांग्रेसका शीर्ष तहका नेताहरुले नै मन्त्रिपरिषद्लाई तत्काल पूर्णता दिन प्रधानमन्त्री शेरबहादुर देउवालाई दबाब दिन सुरु गरेका छन् ।

कांग्रेस उपसभापति विमलेन्द्र निधि, महामन्त्री डा.शशाङ्क कोइराला र नेता प्रकाशमान सिंहले पार्टी, सरकार र सत्तारुढ गठबन्धनबीचको विश्वसनीयतामै ह्रास आएको निष्कर्ष निकाल्दै तत्काल मन्त्रिपरिषद्लाई पूर्णता दिन पार्टी सभापतिसमेत रहनुभएका प्रधानमन्त्री देउवालाई दबाब दिएका हुन् ।

नयाँ बानेश्वरमा रहेको उपसभापति निधिको निवासमा आज सोमवार दिउँसो बसेको तीन नेताको बैठकले सत्तारुढ गठबन्धन दलका नेताहरुलाई पनि विभिन्न कारण देखाएर मन्त्रिपरिषद्लाई पूर्णता दिने काममा ढिलाइ नगर्न सचेत गराएका छन् ।

सरकार र गठबन्धन दलको विश्वसनीयतामाथि नै प्रश्न उठिसकेकाले छिटो भन्दा छिटो मन्त्रिपरिषद्लाई पूर्णता दिन सरकारलाई आग्रह गरिएको उपसभापति निधिले जानकारी दिए ।

नेताहरूबीच १४ औँ महाधिवेशनमा पार्टी पदाधिकारीमा साझा उम्मेदवारी दिने विषयमा पनि छलफल सुरु भएको छ ।

त्यसैगरी बैठकले क्रियाशील सदस्यतासम्बन्धी बाँकी चार जिल्लाको विवाद छिटो टुङ्गो लगाएर पार्टीको वडा अधिवेशन, पालिका अधिवेशन र जिल्ला अधिवेशन समयमै सक्न पनि पार्टी सभापति शेरबहादुर देउवासँग माग गरेको छ ।

पार्टीको १४ औँ महाधिवेशनमा साझा धारणा बनाएर जाने र पदाधिकारीमा साझा उम्मेदवारी दिने विषयमा पनि छलफल सुरु गरिएको उपसभापति निधिले जानकारी दिए ।

नेपाली कांग्रेसको बारा, रौतहट, सप्तरी र रसुवामा अझै पार्टीको क्रियाशील सदस्यतासम्बन्धी विवाद टुङ्गो लागेको छैन ।

त्यसमा पनि नेताहरूले चिन्ता व्यक्त गरेका छन् ।