झारफुक गर्ने बहानामा नाबालिग बलात्कारको आरोपमा एकजना पक्राउ

नयाँ विकल्प विशेष संवाददाता
प्रकाशित मिती: २०८० पुष २९, १६: ४७

बीरगन्ज । झारफुक गर्ने बहानामा १३ वर्षीय नाबालिगलाई बलात्कार गरेको अभियोगमा बारामा एकजना पक्राउ परेका छन् । जिल्ला प्रहरी कार्यालयमा परेको उजुरीको आधारमा शनिबार झारफुक गर्ने एक पुरुषलाई पक्राउ गरिएको प्रहरीले जनाएको छ ।

प्रहरीका अनुसार बाराको महागढीमाई नगरपालिका–२ बस्ने ३० वर्षीय आकाश मण्डल जबरजस्ती करणी गरेको आरोपमा पक्राउ परेका हुन् । बाराका प्रहरी प्रवक्ता दधिराम न्यौपानेले सर्लाहीबाट आएकी नाबालिगलाई झारफुक गर्ने बहानामा बलात्कार गरेको उजुरी पर्नासाथ पीडकलाई पक्राउ गरिएको बताए ।

प्रहरीका अनुसार केही समयदेखि झारफुक गर्ने काम गर्दै आएका मण्डलकोमा झारफुक गराउन पुगेकी बालिकालाई जबरजस्ती करणी गरेको प्रारम्भिक अनुसन्धानमा खुलेको छ ।

जबरजस्ती करणी गरेको आरोपमा पक्राउ परेका मण्डललाई प्रहरी हिरासतमा राखी अनुसन्धान प्रक्रिया अगाडि बढाइएको र आज उनीमाथि म्याद थपको तयारी गरिएको बाराका प्रहरी प्रवक्ता न्यौपानेले बताए ।