तनहुँया १४ द्वः मचाल्यासेतयेत एचपिभी खोप बिइगु

नयाँ विकल्प संवाददाता
प्रकाशित मिती: २०८१ माघ ९, २०: ४९

दमौली : जिल्लाया १४ द्वः सिबें अप्वः मचाल्यासेतयेत मचाछेँया म्हुतुया क्यान्सरविरुद्धया एचपिभी खोप बिइगु जूगु दु । जिल्लाया झिगुलिं स्थानीय तहया ब्वनेकुथियापिं १४ द्वः निसः व ७८ म्ह मिसामस्तय्त एचपिभी खोप बिइत्यंगु खः ।

एचपिभी खोप अभियान थ्व हे माघ २२ गतेनिसें ३० गतेतक न्ह्याइगु स्वास्थ्य ज्याकुथिया प्रमुख शङ्करबाबु अधिकारीं धयादिल । न्हापांगु चरणय् माघ २२ निसें २५ गतेतक व्यास नगरपालिका, भानु नगरपालिका, देवघाट, बन्दीपुर व आँबुखैरेनी गाउँपालिकाय् अभियान न्ह्याइ धाःसा निक्वःगु चरणय् माघ २७ निसें ३० गतेतक शुक्लागण्डकी नगरपालिका, भिमाद नगरपालिका, म्याग्दे, ऋषिङ व घिरिङ गाउँपालिकाय् खोप अभियान न्ह्याइ ।

ज्याकूया प्रमुख अधिकारीया कथं ब्वनेकुथिइ वनाच्वंपिं खुगू निसें झिगू तगिंया १४ द्वः व ७८ म्ह अले ब्वनेकुथि मवनिपिं निसः यानां मुक्कं १४ द्वः निसः व ७८ म्ह मिसामस्तय्त खोप बिइ । भानु नगरपालिकाया झिंप्यसः व ९५, व्यास नगरपालिकाया स्वीच्यासः व ५५, देवघाट गाउँपालिकाया खुसः व ५७, बन्दीपुर गाउँपालिकाया गुसः व ३९, आँबुखैरेनी गाउँपालिकाया झिंनिसः व ३६, म्याग्दे गाउँपालिकाया न्हय्सः व ६६, शुक्लागण्डकी नगरपालिकाया नीन्हय्सः व खुम्ह, भिमाद नगरपालिकाया झिंनिसः व ७७, घिरिङ गाउँपालिकाया न्यासः व ८० व ऋषिङ गाउँपालिकाया न्हय्सः व ८७ म्हेसित खोप बिइत्यंगु दु ।

फुक्कं हे ब्वनेकुथियात खोप केन्द्र कथं न्ह्याकाः खुगू निसें झिगू तगिंयापिं फुक्कं हे मिसामस्त अले ब्वनेकुथि पिनेयापिं १० दँ निसें १४ दँ तकया मचाल्यासेतय्त एचपिभी खोप बिइ ज्याझ्वः दु । ब्वनेकुथि मदुथाय् गां, त्वाः व लिउनेलानाच्वंगु समुदायया निंतिं थप खोप केन्द्रपाखें एचपिभी खोप अभियान न्ह्याकेगु तयारी दूगु अधिकारीं धयादिल ।

गुदँ न्ह्यः चितवन व कास्कीइ एचपिभी खोप सेवा न्ह्याकूगु खः । उगू इलय् खुगू तगिमय् ब्वनाच्वंपिं व ब्वनेकुथिइ मवंपिं १० दँ या मचाल्यासेतय्त फुक्क हे ब्वनेकुथिइ खोप केन्द्र न्ह्याकाः एचपिभी खोप खुला पाक्क निगू मात्रा ब्यूगु खः ।

सम्बन्धित समाचार

एमाले भ्रष्टाचारीलाई जोगाउने पार्टी हो, तत्काल एकता सम्भव छैन : प्रचण्ड

२०८१ माघ ९, २०: ४९

काठमाडौं : नेपाली कम्युनिस्ट पार्टीका संयोजक एवं पूर्वप्रधानमन्त्री पुष्पकमल दाहाल ‘प्रचण्ड’ले नेकपा (एमाले) सँग राष्ट्रिय मुद्दाहरूमा सहकार्य हुनसक्ने भएपनि तत्काल...