जयनगर–कुर्था अन्तर्देशीय रेल खण्ड नेपाललाई हस्तान्तरण

काठमाडौं । भारत सरकारले जयनगर–जनकपुर–कुर्था रेलमार्ग नेपाललाई हस्तान्तरण गरेको छ । शुक्रबार एक समारोहकाबीच नेपाल सरकारलाई हस्तान्तरण गरेको हो ।

परियोजना कार्यान्वयन निकाय इरकाँन इन्टरनेशनल लिमिटेड भारतले उक्त रेल खण्ड नेपाल सरकारको तर्फबाट उपस्थित नेपाल रेलवे कम्पनी लिमिटेडलाई हस्तान्तरण गरेको हो । समारोहमा नेपालका लागि भारतीय राजदूत विनय मोहन क्वात्रा र भौतिक पूर्वाधार तथा यातायात मन्त्री श्रीमती रेनुकुमारी यादवको सहभागीता रहेको थियो ।

३५ किलोमिटर लम्बाईको रेलमार्ग निर्माण ८ अर्बको लागतमा अनुदानस्वरुप भएको थियो । कुल लम्बाई ६९ किलोमिटर रहेको यो रेलमार्ग सञ्चालनमा आएपछि जयनगरको रेल बर्दिबाससम्म आउने छ ।

नेपालले आफैँ चलाउने भनेको भए पनि पछिल्लो समय उक्त रेलमार्ग चलाउने जिम्मा पनि नेपालले भारतीय कम्पनी कोनकरलाई नै जिम्मा दिइएको छ । कोनकरले हाल उक्त रेलमार्ग सञ्चालनका लागि नेपाली पक्षलाई सिकाउने काम गर्दै आएको छ ।