एसियन गेम्समा नेपाल छनोट, पुरुष क्रिकेट टोलीको ऐतिहासिक सफलता

नयाँ विकल्प
प्रकाशित मिती: २०८३ जेष्ठ १९, १८: १३

काठमाडौं । नेपाली पुरुष राष्ट्रिय क्रिकेट टोली जापानमा आयोजना हुने आगामी एसियन गेम्सका लागि छनोट भएको छ।

सिंगापुरमा जारी एसियन गेम्स क्रिकेट छनोट प्रतियोगिताअन्तर्गत मंगलबार समूह ‘ए’ को खेलमा मलेसियाले चीनलाई पराजित गरेपछि नेपाल र मलेसिया दुवैले एसियन गेम्समा स्थान सुरक्षित गरेका हुन्।

नेपालले आफ्नो पहिलो खेलमा चीनलाई २१२ रनको फराकिलो अन्तरले हराउँदै प्रतियोगितामा उत्कृष्ट सुरुआत गरेको थियो। अब नेपालले बिहीबार मलेसियासँग समूह चरणको अन्तिम खेल खेल्ने तालिका रहेको छ।

प्रतियोगिताबाट सेमिफाइनलमा पुग्ने चार टोली एसियन गेम्सका लागि छनोट हुने प्रावधान छ। समूह ‘बी’ मा हङकङ, ओमान, सिंगापुर र बहराइन रहेका छन्।

पुरुष क्रिकेटतर्फ एसियन गेम्समा कुल १० राष्ट्रको सहभागिता रहनेछ। आयोजक जापानसहित अन्तर्राष्ट्रिय क्रिकेट परिषद् (आईसीसी) का पूर्ण सदस्य राष्ट्रहरू भारत, पाकिस्तान, श्रीलंका, बंगलादेश र अफगानिस्तान यसअघि नै स्वतः छनोट भइसकेका छन्।

नेपालको यो उपलब्धिले अन्तर्राष्ट्रिय क्रिकेटमा अर्को महत्वपूर्ण सफलता थपेको छ।