- अनामनगर काठमाडौँ
- infobikalpa21@gmail.com
काठमाडौं । नेपाल क्रिकेट संघ (क्यान) ले मलेसियामा आयोजना हुने एसीसी पुरुष प्रिमियर कपका लागि नेपाली राष्ट्रिय क्रिकेट टोलीको बिदाइ गरेको छ ।
कप्तान सन्दीप लामिछानेको नेतृत्वमा रहेको नेपाली टोली शुक्रबार भारत प्रस्थान गर्नेछ । टोलीले भारतमा १० दिन तयारी गरेपछि त्यहीँबाट मलेसिया प्रस्थान गर्नेछ ।
बिदाइ कार्यक्रममा कप्तान लामिछानेले एसीसी प्रिमियर कपको उपाधि जित्ने लक्ष्यसहित नेपाली टोली मलेसिया जाने बताए । पछिल्ला खेलमा भएका कमजोरी पहिचान गरी सुधार गर्न भारतमा हुने १० दिने तयारी महत्वपूर्ण हुने उनको भनाइ छ ।
‘हामी मोटिभेसनका साथ मलेसिया जानेछौँ । नेदरल्यान्ड्सबाट फर्किएपछि कहाँ चुक्यौँ र कहाँ गल्ती भयो भन्ने पहिचान गरेर त्यसमा काम गर्न बैङ्गलोरमा क्याम्प आयोजना गरिएको छ,’ लामिछानेले भने ।
भारतमा हुने प्रशिक्षणबाट मलेसियासँग मिल्दोजुल्दो कन्डिसनमा अभ्यास गर्ने अवसर प्राप्त हुने उनले बताए । टोलीले आफ्ना कमजोरी सुधार गर्दै एसीसी प्रिमियर कपको ट्रफी नेपाल ल्याउने भरपूर प्रयास गर्ने उनको भनाइ छ ।
यस्तै, क्यानका सचिव तथा पूर्वराष्ट्रिय क्रिकेटर पारस खड्काले राष्ट्रिय टोलीको नयाँ स्क्वाड र कप्तानी परिवर्तनलाई लिएर प्रश्न उठे पनि क्रिकेट टिम गेम भएकाले सबै खेलाडीको भूमिका महत्वपूर्ण हुने बताए ।
खड्काले सन्दीप लामिछानेलाई नेपाली पुरुष एकदिवसीय टोलीको नेतृत्व गर्ने जिम्मेवारी दिइएको जानकारी दिँदै पछिल्लो समय नेपाली खेलाडीले राम्रो क्रिकेट खेल्दै आएको बताए ।
उनले एसीसी प्रिमियर कपको उपाधि जित्न सबै पक्ष एकजुट भएर अघि बढ्नुपर्ने बताए । पछिल्ला पाँच–छ वर्षमा नेपाली राष्ट्रिय टोलीले ऐतिहासिक उपलब्धि हासिल गरे पनि केही खेलमा अपेक्षाअनुसार प्रदर्शन गर्न नसकेको उनको भनाइ थियो ।
नेपाली क्रिकेटलाई थप बलियो बनाउन खेलाडीलाई प्रोत्साहन र सहयोग गर्न क्यान प्रतिबद्ध रहेको खड्काले बताए । राष्ट्रिय खेलकुद परिषद्, युवा तथा खेलकुद मन्त्रालय, नेपाल सरकार, प्रायोजक तथा अन्य सरोकारवालाको सहयोगबाट नेपाली क्रिकेट यहाँसम्म आइपुगेको उनले उल्लेख गरे ।
खड्काले एसीसी प्रिमियर कपमा नेपाली टोलीले उत्कृष्ट प्रदर्शन गर्दै उपाधि जितेर एसिया कपका लागि छनोट हुने विश्वास व्यक्त गरे ।
यसअघि क्यानले सन्दीप लामिछानेको कप्तानीमा १४ सदस्यीय नेपाली राष्ट्रिय क्रिकेट टोली घोषणा गरेको थियो । टोलीमा सन्दीप लामिछाने, आसिफ शेख, अर्जुन कुमाल, रोहित पौडेल, देव खनाल, दीपेन्द्रसिंह ऐरी, बसिर अहमद, ईशान पाण्डे, गुल्शन झा, शेर मल्ल, ललित राजवंशी, करण केसी, हेमन्त धामी र सन्दीप जोरा रहेका छन् ।
काठमाडौं : नेपाल क्रिकेट संघ (क्यान)ले नेपाली राष्ट्रिय क्रिकेट टोलीको एकदिवसीय (ओडिआई) कप्तान परिवर्तन गर्दै स्पिनर सन्दीप लामिछानेलाई नयाँ कप्तान...
काठमाडौं : नेपाल प्रिमियर लिग (एनपिएल) २०२६ को मिति सार्वजनिक भएको छ । नेपाल क्रिकेट संघ (क्यान)ले शनिबार बेलुका एनपिएलको...
काठमाडौं । आइसीसी क्रिकेट विश्वकप लिग–२ अन्तर्गत जारी सिरिजको अन्तिम खेलमा नेपाल नेदरल्यान्ड्ससँग ५७ रनले पराजित भएको छ। यस हारसँगै...
