राष्ट्रिय महिला फुटबल टोली आज राति ११ बजे इस्तानबुल हुँदै उज्वेकिस्तान जाँदै

नयाँ विकल्प,

काठमाडौं– उज्वेकिस्तानमा हुने एएफसी महिला एसियन कप २०२२ छनोट प्रतियोगितामा सहभागी हुने नेपाली राष्ट्रिय महिला फुटबल टोलीलाई सोमवार बिदाइ गरिएको छ ।

अखिल नेपाल फुटबल सङ्घ (एन्फ) ले एक कार्यक्रमको आयोजना गरेर उज्वेकिस्तानमा हुने छनोट खेलका लागि नेपाली टोलीलाई बिदाइ गरेको हो ।

टोली आज राति ११ बजे इस्तानबुल हुँदै उज्वेकिस्तान जाँदै छ ।

छनोट खेल्न जानुअघि नेपालले त्रिपुरेश्वरमा रहेको दशरथ रङ्गशालामा बङ्गलादेशलाई आतिथ्यता गर्दै दुई अभ्यास खेल खेलेको थियो ।

त्यही खेलमा भएका कमजोरीलाई सुधार गर्दै छनोट खेलबाट सुखद नतिजा लिएर नेपाल फर्किने नेपाली टोलीकी कप्तान रेनुका नगरकोटीले बताइन् ।

उज्वेकिस्तानको जेएआर स्टेडियममा हुने छनोटमा नेपालसँगै हङकङ र फिलिपिन्स रहेका छन् ।

नेपालले फिलिपिन्ससँग असोज २ गते खेल्दै प्रतियोगिताको सुरुवात गर्नेछ ।

यस्तै नेपालको दोस्रो खेल असोज ५ गते हङकङसँग हुनेछ ।