शहीद स्मारक लिगः भोलिदेखि तेस्रो चरणका खेल

नयाँ विकल्प
प्रकाशित मिती: २०७८ मंसिर १६, १५: ५७

काठमाडौं । शहीद स्मारक ‘ए’ डिभिजन लिगको तेस्रो चरणका खेल शुक्रबारदेखि सुरु हुँदैछन् । जारी लिगका तेस्रो चरणका खेल त्रिपुरेश्वरस्थित दशरथ रंगशालामा हुने अखिल नेपाल फुटबल संघ (एन्फा)ले जनाएको छ ।

चार दिनसम्म चल्ने तेस्रो चरणमा तीन दिन दुई खेल हुनेछ । एक दिन एक मात्रै खेल हुने तालिका सार्वजनिक भएको छ । दिनमा दुई खेल हुँदा पहिलो खेल दिउँसो १ बजे सुरु हुनेछ भने दोस्रो खेल साँझ पौने ५ बजे हुनेछ । शुक्रबारको पहिलो खेलमा फ्रेण्ड्स क्लबले थ्री स्टार क्लबको सामना गर्दैछ ।

दोस्रो खेलमा नवप्रवेशी सातदोबाटो युथ क्लब लगातार दुई खेलमा पराजित भई पुछारमा रहेको एपीएफ फुटबल क्लबसँग भिड्नेछ । यस्तै शनिबारको पहिलो खेलमा दोस्रो स्थानको संकटा क्लबले शीर्षस्थानको मनाङ मस्र्याङ्दी क्लबलाई चुनौती दिनेछ ।

तेस्रो चरणअन्तर्गत आइतबार हुने एक मात्रै खेलमा ब्रिगेड ब्वाइज क्लबले त्रिभुवन आर्मी फुटबल क्लबको आक्रामक सैलीको सामना गर्नेछ । लिगमा १४ क्लब सहभागी हुनेछन् ।