काँग्रेस महाधिवेशनः नयाँ नेतृत्व चुन्न मतदान सुरु

नयाँ विकल्प संवाददाता
प्रकाशित मिती: २०७८ मंसिर २७, १२: ००

काठमाडौं । नेपाली काँग्रेसको १४औं महाधिवेशन अन्तर्गत मतदान सुरु भएको छ । नयाँ नेतृत्व चयन गर्न विहान ८ बजेदेखि सुरु हुने भनिए पनि करिव ३ घण्टापछि मतदान सुरु भएको केन्द्रीय निर्वाचन समितिले बताएको हो ।

समितिका अनुसार साँझ ५ बजेसम्म मतदान गरिसक्ने कार्यतालिका छ । भृकुटीमण्डप र राष्ट्रिय सभागृहमा प्रतिनिधिहरुका लागि मतदानस्थल तयार पारिएको छ । भोट खसाल्न उत्साहित प्रतिनिधिहरु मतदान केन्द्रहरुमा लामबद्ध भएका छन भने उम्मेदवारहरु उनीहरुसंग मत मागिरहेका छन् ।

सभापति, दुई जना उपसभापति, दुई जना महामन्त्री, आठ जना सहमहामन्त्री निर्वाचित गर्ने महाधिवेशनमा २९ प्रकारका मतपत्रको व्यवस्था र सबै मतपत्रका लागि छुट्टाछुट्टै मतपेटिकाको व्यवस्था गरिएको समितिले जनाएको छ ।

राष्ट्रिय सभागृहमा पार्टी केन्द्रीय कार्यसमिति, जनसम्पर्क समिति, भातृ र शुभेच्छुक संघसंस्था, कर्णाली प्रदेश र लुम्बिनी प्रदेशका मतदाताले मतदान गर्ने व्यवस्था गरिएको छ भने प्रदेश २ र गण्डकी प्रदेशका मतदाताले भृकुटीमण्डको प्रांगणमा रहेको छ ।

त्यस्तै प्रदेश १, बागमती र सुदूरपश्चिम प्रदेशका महाधिवेशन प्रतिनिधिका लागि भृकुटीमण्डपको प्रदर्शनी हलभित्र मतदान गर्ने व्यवस्था रहेको समितिले बताएको छ ।

केन्द्रीय निर्वाचन समितिले मतदानका लागि ४ हजार ७ सय ४३ जना प्रतिनिधिको नामावली सार्वजनिक गरेको छ । प्रतिनिधिहरुले मतदानबाट विभिन्न क्लस्टरबाट १२१ जना केन्द्रीय समितिमा उम्मेदवार निर्वाचित हुने बताइएको छ ।