कोशी प्रदेशसभाः विधेयक सर्वसम्मतिसँ पारित

नयाँ विकल्प संवाददाता
प्रकाशित मिती: २०८२ श्रावण २५, २१: ०७

विराटनगर : कोशी प्रदेशसभाक आजुक बैसारमे ‘योगदानमूलक निवृत्तभरण कोष स्थापना तथा सञ्चालन सम्बन्धमे व्यवस्था करए लेल बनल विधेयक’ सर्वसम्मतिसँ पारित भेल अइछ।

कोशी प्रदेश सरकारक आर्थिक मामिला तथा योजनामन्त्री रामबहादुर मगर विधेयक पारित कएल जाए से प्रस्ताव पेश कएने छल। ओइ विधेयककेँ सभामुख अम्बरबहादुर विष्ट निर्णयार्थ प्रस्तुत कएलाक बाद विधेयक सर्वसम्मतिसँ पारित भेल।

विधेयकमे कोशी प्रदेशसभा सदस्य रमेश कुमार बस्नेत आ शोभा चेम्जोङ संशोधन प्रस्ताव राखने छल। प्रदेशसभा सदस्य बस्नेतकेँ संशोधन प्रस्ताव अस्वीकार भेल छल, जखन कि प्रदेशसभा सदस्य चेम्जोङ अपन प्रस्ताव वापस ल लेलैन।

आइकेँ बैसारमे ‘कोशी प्रदेशमे सरकारक कामकाजक भाषा सम्बन्धमे व्यवस्था करए लेल बनल विधेयक’ सदनमे टेबुल भेल अइछ। सामाजिक विकासमन्त्री पाँचकर्ण राई ओइ विधेयक प्रस्ताव कएने छल। ओ कहलैन जे भाषा आयोग अइ प्रदेशमे १४ टा भाषाक सिफारिस कएलाक बादो अखन लेल लिम्बू आ मैथिली भाषाकेँ सरकारी कामकाजक लेल बनाएल जाएत, सङे अइमे सरकारक आर्थिक भार सेहो बढ़ल कहलैन।

विशेष समय

बैसारक विशेष समयमे जनता समाजवादी पार्टी कोशी प्रदेशसभाक संसदीय दलक नेता निर्मला लिम्बू, लिम्बू भाषामे अपन बात राखलैन।

शून्य समय

बैसारक शून्य समयमे कोशी प्रदेशसभा सदस्य खिनु लङ्वा लिम्बू, गोम्बु शेर्पा, मीना श्रेष्ठ, रामदेव यादव, रामप्रसाद महतो, कमला दर्नाल, शीलादीक्षित कार्की, मैया श्रेष्ठ आ भीम पराजुली प्रदेशक समसामयिक विषयमे सरकारक ध्यानाकर्षण करौलैन।

प्रदेशसभाक अगला बैसार अइ साओन २६ गते दिनक १ बजे हएत।