ऊर्जामन्त्री खड्कापाखें गण्डक नहर सिँचाइ आयोजनाया ‘सेटलिङ्ग बेसिन’या उलेज्या

नयाँ विकल्प संवाददाता
प्रकाशित मिती: २०८२ जेष्ठ २६, २०: ३८

येँ : ऊर्जा, जलस्रोत नापं सिँचाइमन्त्री दीपक खड्कां पश्चिम नवलपरासीइ च्वंगु नेपाल गण्डक पश्चिम नहर सिँचाइ आयोजनाया ‘सेटलिङ्ग बेसिन’या उलेज्या यानादीगु दु ।

नेपाल गण्डक पश्चिम नहर सिँचाइ व्यवस्थापन ज्याकुथिं थौं नवलपरासीया सेमरीइ ग्वसाःग्वःगु ज्याझ्वलय् मन्त्री खड्का व उगु लागाया सांसद विनोद चौधरीं उगु बेसिनया मंकाः कथं उलेज्या यानादीगु खः ।

ज्याझ्वलय् मन्त्री खड्कां पश्चिम नवलपरासीया नागरिकतय्सं फयावयाच्वंगु डुबान व सिँचाइया समस्या ज्यंकेत थः प्रतिबद्ध जूगु धयादिल । “थन दूगु ६ गू खुसिइ तटबन्ध यायेमानि, उकिया नितिं गाक्क बजेटया आवश्यकता दु, थुकिया नितिं सरकार गम्भीर जू,” ऊर्जामन्त्री खड्कां धयादिल ।

मन्त्री खड्कां पश्चिम नवलपरासीइ थः मन्त्री जुइधुंकाः निक्वःखुसी वयागु व थनया समस्याया बारे थःम्हं स्यू धकाः धयादिल । वय्कलं सांसद विनोद चौधरीथेंजाःम्ह राष्ट्रिय अन्तरराष्ट्रियस्तरय् स्थापित व्यक्ति थ्व थासय् दूगु गौरवया विषय जूगु धयादिल ।

ज्याझ्वलय् पश्चिम नवलपरासी–१ पाखें निर्वाचित प्रतिनिधिसभा दुजः विनोद चौधरीं आः न्हापास्वयां नहरपाखें न्याक्वः अप्वः भूमिइ सिँचाइ सुविधा दइगु जुइधुंकाः किसान लाभान्वित जुइ धकाः धयादिल ।

“थ्व नहर पूवंक सञ्चालनय् वइगु व्यवस्था मिलेयायेधुंकाः नवलपरासीया किसानतय् ख्वालय् लसतां जाःगु खनाः जित तसकं सन्तुष्टि जूगु दु, ‘थनया नागरिकतय्सं ३५ दँ सिँचाइया नितिं गुगु सङ्घर्ष यायेमाःगु खः, छिकिपिनिगु पीडालिसे स्वानाच्वंगु उगु वेदनात आः संबोधन जूगु दु,” वय्कलं धयादिल ।

सांसद चौधरीं उगु लागाया डुबानया समस्या ज्यंकेत सरकारं आवश्यक बजेट विनियोजन यानाः दीर्घकालीन कथं ज्यंकेगु लँपु मालेत नं मन्त्री खड्कायात इनाप यानादिल ।

नेपाल गण्डक पश्चिमी नहरया सेटलिङ्ग बेसिन ३५ क्वति ध्यबाया परियोजना दच्छित्यां पूवंगु खः । विक्रम संवत् २०३९ य् निर्माण जूगु नहरया सिँचाइ क्षमता ८७०० हेक्टर क्षेत्रफल जूसां नं मुहानय् हे फि मुनीगु समस्यां यानाः २० प्रतिशत क्षमताय् जक सिँचाइ जुयावयाच्वंगु खः ।

थौं उलेज्या जूगु सेटलिङ्ग बेसिन निर्माणलिपा आः नहरय् फि वनीमखुगु नापनापं ८७०० हेक्टर जमिनय् सिँचाइ सुविधा थ्यनी ।