त्रिविविको बेथिति र भ्रष्टाचारबिरुद्ध आन्दाेलित बिद्यार्थीलाई प्रहरीले गिरफ्तार गर्यो

नयाँ विकल्प,
काठमाडौं – नेपाल विद्यार्थी संघले त्रिभुवन विश्वविद्यालयमा भएको भ्रष्टाचार र बेथितिको बिरुद्ध मंगलबार गरेको शान्तिपूर्ण आन्दोलनमा प्रहरीले हस्तक्षेप गरी एक दर्जन विद्यार्थीलाई गिरफ्तार गरेको छ ।

नेविसंघको त्रिविवि समितिले गरेको आन्दोलनका क्रममा विद्यार्थीहरु योगेन्द्र रावल, दिपक ओझा, रुपेश शाह लगायत नेताहरूलाई त्रिभुवन विश्वविद्यालयबाट प्रहरीले गिरफ्तार गरेको हो ।

विश्वविद्यालयमा ब्याप्त विकृति, बिसंगति, बेथिति, भ्रष्टचार एवंं विश्वविद्यालयलाई नेकपाका कार्यकर्ता भर्तीकेन्द्र बनाउने र कब्जा गर्ने दुषित मनशायविरुद्ध उत्रिएका विद्यार्थीलाई प्रहरीले पक्राउ गरेको हो ।

वार्ता, संवाद, छलफल र समन्वयमार्फत सामाधान पहिल्याउनुको साटो उल्टै विद्यार्थीमाथि दमन, धरपक्कड र प्रहरी प्रशासनको बलमा आफ्नो कुत्सित मनशाय पूर्ति गर्ने खेलमा विश्वविद्यालय उद्यत भएको नेविसंघ महामन्त्री बलदेव तिमल्सिनाले जनाए ।

नेविसंघले पक्राउ गरिएका विद्यार्थीहरुलाई तत्काल रिहा गर्न तथा वार्ता र संवादमार्फत जायज मागहरु पूरा गर्न विश्वविद्यालयको गम्भिर ध्यानाकर्षण गराएको छ ।

महामन्त्री बलदेव तिमल्सिनाले त्रिवि व्यवस्थापन गम्भीर नभए यसबाट उत्पन्न हुने सबै परिस्थितिको सामना गर्न तयार रहन गम्भीर चेतावानी दिएका छन् ।

‘त्रिविविको परिसरमा सयौंको संख्यामा प्रहरी उपस्थित गराइ विद्यार्थी तथा प्राध्यापकहरुलाई आतंकित पार्ने कार्य निन्दनिय छ’, महामन्त्री तिमल्सिनाले भने, ‘विद्यार्थी र प्राध्यापकलाई राज्य आतंकको भरमा तह लगाउँछु भन्ने सोच उपकुलपतिले राखेका छन् ।’

ठूला तानाशाहलाई परास्त गर्ने विद्यार्थीको तागतको अघि सत्ताको तावेदारीमा रमाउँदै सत्ता र दमनको माध्यमबाट टिकिराख्ने दिवस्वप्न त्याग्न उपकूलपति डा. धर्मकान्त बाँस्कोटालाई तिमल्सिनाले चेतावनी दिएका छन् ।