गणेशमान सिंहको २९औँ स्मृति दिवस आज, कांग्रेसका भ्रातृ एवं शुभेच्छुक संस्थाले विविध कार्यक्रम गर्दै – Naya Bikalpa
November 16, 2026, Monday      Epaper

गणेशमान सिंहको २९औँ स्मृति दिवस आज, कांग्रेसका भ्रातृ एवं शुभेच्छुक संस्थाले विविध कार्यक्रम गर्दै

काठमाडौं । २०४६ सालको जनआन्दोलनका सर्वोच्च कमान्डर एवं नेपाली कांग्रेसका नेता गणेशमान सिंहको २९औँ स्मृति दिवस आज विभिन्न कार्यक्रम आयोजना गरी मनाइँदैछ । नेपाली कांग्रेसका भ्रातृ तथा शुभेच्छुक संस्थाले सिंहको योगदानको स्मरण गर्दै विविध कार्यक्रम गर्न लागेका हुन् ।

नेपाली राजनीतिमा त्याग, साहस र निष्ठाका प्रतीकका रूपमा स्मरण गरिने सिंहले २०४६ सालको जनआन्दोलन सफल भएपछि तत्कालीन राजा वीरेन्द्रले प्रधानमन्त्री बन्न गरेको आग्रह अस्वीकार गरेका थिए । उनले आफ्ना समकक्षी कृष्णप्रसाद भट्टराईलाई प्रधानमन्त्रीका रूपमा अघि सारेका थिए ।

विसं १९७२ कात्तिक २४ गते काठमाडौंको क्षेत्रपाटीमा जन्मिएका सिंहको २०५४ साल असोज २ गते निधन भएको थियो । उनले राणाशासनविरुद्धको आन्दोलनमा सक्रिय हुँदै प्रजा परिषद्को सदस्यका रूपमा राजनीतिक यात्रा सुरु गरेका थिए ।

२००७ सालको क्रान्तिअघि भद्रगोल जेलबाट भागेर भारत पुगेका सिंहले त्यहाँ बीपी कोइरालासँग राजनीतिक सम्बन्ध स्थापित गरेका थिए । २००३ सालमा स्थापना भएको नेपाली राष्ट्रिय कांग्रेसको नेतृत्वसमेत उनले गरेका थिए ।

२००७ सालमा प्रजातन्त्र स्थापनाका लागि भएको सशस्त्र क्रान्तिमा सिंहले वीरगन्ज मोर्चाको नेतृत्व गरेका थिए । त्यसपछि २०१५ सालको पहिलो आमनिर्वाचनपछि गठन भएको सरकारमा उनी वरिष्ठ मन्त्री बने ।

२०१७ सालमा राजा महेन्द्रले प्रजातन्त्र समाप्त गर्दै शासनसत्ता आफ्नो हातमा लिएपछि सिंहले लामो काराबास जीवन बिताउनुपरेको थियो । उनले सिंहदरबार र सुन्दरीजल बन्दीगृहमा करिब आठ वर्ष बिताएका थिए ।

२०२५ सालमा बीपी कोइरालासँगै सुन्दरीजल बन्दीगृहबाट रिहा भएपछि सिंह भारत निर्वासनमा पुगेका थिए । निर्वासनका क्रममा उनले प्रजातन्त्र पुनःस्थापनाका लागि राजनीतिक संगठन विस्तार तथा आन्दोलनमा सक्रिय भूमिका निर्वाह गरे ।

२०४६ सालको जनआन्दोलनमा वामपन्थी दलहरूसँग समेत सहकार्य गर्दै आन्दोलनको नेतृत्व गरेका सिंहलाई सो आन्दोलन सफल बनाउन महत्वपूर्ण भूमिका निर्वाह गर्ने नेताका रूपमा स्मरण गरिन्छ।

सम्बन्धित समाचार

समावेशिता र संघीयताले प्रजातन्त्रलाई बलियो बनाएको छ : गगन थापा
समावेशिता र संघीयताले प्रजातन्त्रलाई बलियो बनाएको छ : गगन थापा
  • २०८३ आश्विन २, ०७: ३८

वीरगञ्ज । नेपाली कांग्रेसका सभापति गगनकुमार थापाले मुलुक समावेशिता र संघीयताको अभ्यासमा गएपछि प्रजातन्त्र थप बलियो बनेको बताएका छन् ।...

स्थानीय निर्वाचनबारे छलफल गर्न मंसिर ४ गते दलहरूलाई बोलायो आयोगले
स्थानीय निर्वाचनबारे छलफल गर्न मंसिर ४ गते दलहरूलाई बोलायो आयोगले
  • २०८३ आश्विन २, ०७: ३८

काठमाडौँ । निर्वाचन आयोगले आगामी स्थानीय तहको निर्वाचनबारे राजनीतिक दलहरूसँग परामर्श प्रक्रिया अघि बढाएको छ । आयोगले यस विषयमा छलफल...

दुर्घटनामा परिवारका ६ सदस्य गुमाएका यादवलाई गगन थापाको सान्त्वना
दुर्घटनामा परिवारका ६ सदस्य गुमाएका यादवलाई गगन थापाको सान्त्वना
  • २०८३ आश्विन २, ०७: ३८

सर्लाही । नेपाली कांग्रेसका सभापति गगनकुमार थापा आफ्नो निर्वाचन क्षेत्र सर्लाही–४ अन्तर्गत धनकौलस्थित छठ घाटमा पुगेर छठ पर्वमा सहभागी भएका...