प्रदेश कमिटी बनाउँदा नेकपामा रडाको – Naya Bikalpa
November 19, 2026, Thursday      Epaper

प्रदेश कमिटी बनाउँदा नेकपामा रडाको

काठमाडौं । नेकपाका वरिष्ठ नेता तथा पूर्वप्रधानमन्त्री माधवकुमार नेपाल र अर्का नेता नारायणकाजी श्रेष्ठ नभएको भन्दै नेपाल कम्युनिष्ट पार्टी (नेकपा) मा रडाको मच्चिएको छ ।

नेपाल र श्रेष्ठ नभएको मौका छोपेर अध्यक्षद्धय प्रधानमन्त्री केपी शर्मा ओली र पुष्पकमल दाहाल प्रचण्डले मात्र सहमतिमा प्रदेश कमिटी निर्माण गर्ने निर्णय गरिएको खुलासा भएको छ । यो निर्णयपछि पार्टीभित्र प्रणाली समाप्त भएको टिप्पणी उनीहरुले गरिरहेका छन् ।

केही समयअघि मापदण्ड परिमार्जन गरेर पार्टीमा वरिष्ठतालाई ख्याल गरेर निर्णय टुंग्याउने जिम्मा ओली र दाहाललाई दिएको थियो । प्रदेश कमिटीको टुंगो लगाउन स्थायी समितिमा छलफल हुनुपर्ने बताउँदै नेकपाभित्र असन्तुष्ट चर्किएको हो । प्रदेश संगठन कमिटीको नेतृत्वमा पूर्वएमालेबाट १५ र माओवादीबाट १३ जना नेतालाई जिम्मेवारी दिइएको छ ।

एकताको निर्णय कुनै प्रणालीका आधारमा नगरिएकाले कम्पनीको एकीकरणजस्तो भएको आरोप लागेको छ । एकीकरणको निर्णयपछि प्रदेश १ का अध्यक्षमा दाबेदार रहेका जगन्नाथ खतिवडाले एकता प्रक्रियाप्रति कडा आपति जनाएका छन् । नेकपाको प्रदेश संगठन कमिटीको नेतृत्वमा अध्यक्ष केपी ओली नै हाबी देखिएका छन् ।

उनी निकट १० नेताले जिम्मेवारी पाएका छन् । जसअनुसार इन्चार्जको जिम्मेवारी २ नम्वर प्रदेशका सत्यनारायण मण्डल, गण्डकी प्रदेशका पृथ्वी सुब्बा गुरुङ र ५ नम्वर प्रदेशका शंकर पोखरेल, सहइन्चार्जको जिम्मेवारी गण्डकी प्रदेशका खगराज अधिकारी, अध्यक्षमा १ नम्वर प्रदेशमा क्रमशः देवराज घिमिरे, कर्णाली प्रदेशमा गोरखबहादुर बोगटी र सात नम्वरमा कर्णबहादुर थापा, सचिवहरू क्रमशः तीन नम्वर प्रदेशमा आनन्दप्रसाद पोखरेल, चार नम्वर प्रदेशमा गोविन्द नेपाली, २ नम्वर प्रदेशमा सुमन प्याकुरेल अध्यक्ष ओली निकट हुन् ।

यस्तै, अर्का अध्यक्ष प्रचण्ड निकट आठ जनाले जिम्मेवारी पाएका छन् । इन्चार्ज जनार्दन शर्मा कर्णाली प्रदेश, सहइन्चार्ज हितबहादुर तामाङ तीन नम्वर प्रदेश, अध्यक्षहरू नारायण दाहाल तीन नम्वर प्रदेश, प्रभु शाह २ नम्वर प्रदेश, हितराज पाण्डे गण्डकी प्रदेश र ओनसरी घर्ती पाँच नम्वर प्रदेश तथा सचिवहरू सुरेश राई एक नम्वर प्रदेश र जगप्रसाद शर्मा ५ नम्वर प्रदेश प्रचण्ड निकट छन् ।

यस्तै, वरिष्ठ नेता माधकुमार नेपाल पक्षका तीन जना अष्टलक्ष्मी शाक्य तीन नम्वर प्रदेश, भीमबहादुर रावल सात नम्वर प्रदेश, भीम आचार्य एक नम्वर प्रदेशले इन्चार्जको जिम्मेवारी पाएका छन् । पूर्वएमालेतर्फ ओली र नेपालबाट ३ र ३ जना इन्चार्ज भए पनि बाँकी नेतृत्वमा रहेका भने कोही पनि नेपाल निकट होइनन् ।

केन्द्रीय सचिवालय सदस्य रामबहादुर थापा ‘बादल’ निकट चार जनाले जिम्मेवारी पाएका छन् । जसअनुसार सहइन्चार्ज सावित्रीकुमार काफ्ले एक नम्वर प्रदेश र लक्ष्मण जोशी सात नम्वर प्रदेश तथा सचिवहरू मायाप्रसाद शर्मा कर्णाली र मेपबहादुर चौधरी ७ नम्वर प्रदेश उनी निकट हुन् । यसैगरी, सचिवालय सदस्य वामदेव गौतम निकट दुई जना यमलाल कँडेल कर्णाली प्रदेश र दलबहादुर राना पाँच नम्वर प्रदेशले सहइन्चार्जको जिम्मेवारी पाएका छन् । अर्का नेता नारायणकाजी श्रेष्ठ निकट विश्वनाथ शाहले २ नम्वर प्रदेशमा सहइन्चार्जको जिम्मेवारी पाएका छन् ।

नेपाल, बादल र श्रेष्ठ समूह असन्तुष्ट सचिवालयबाट परिमार्जित मापदण्डका आधारमा तल्ला कमिटीको नेतृत्व टुंग्याउनुपर्ने नेता नेपाल, झलनाथ खनाल, बादल र नारायणकाजी श्रेष्ठले अडान राख्दै आएका थिए । तर, नेपाल र श्रेष्ठ विदेश भ्रमणमा रहेकै बेला बिनामापदण्ड प्रदेशको नेतृत्व टुंग्याइएको बताउँदै उनीहरू निकट नेताहरूमा असन्तुष्टि छाएको छ । दुवै पार्टीका साविकका कमिटीमा वरिष्ठतामा अगाडि रहेकालाई नेतृत्वमा प्राथमिकता दिनुपर्ने उनीहरूले अघिल्लो सचिवालय बैठकमा अडान राखेका थिए ।

प्रदेश १ मा अध्यक्ष तथा ४ र ५ मा मुख्यमन्त्रीलाई नै इन्चार्जको जिम्मेवारी तोकिएकामा नेता नेपालसहित उनीहरू असन्तुष्ट बनेका हन् । सरकारको कार्यकारी प्रमुखको जिम्मेवारीमा रहेकालाई नै पार्टीमा पनि कार्यकारी जिम्मेवारी दिने कुराले न्यायोचित जिम्मेवारी बाँडफाँट नभएको र महत्वपूर्ण नेताहरू अवसरबाट वञ्चित भएको उनीहरूको तर्क छ ।

आफ्नो फेसबुक स्ट्याटसमा खतिवडाले ‘पार्टीका वरिष्ठ नेता माधवकुमार नेपाल र प्रवक्ता नारायणकाजी श्रेष्ठजस्ता सचिवालयका महत्वपूर्ण सदस्यहरू नभएको मौका पारी अचानक प्रदेश पार्टी एकीकरण सम्पन्न गर्न नेतृत्व चयन गरेको भनेर समाचार सार्वजनिक भएको छ । तर, कुनै उचित आधार तथा मूल्यांकनको प्रणाली कमिटीगत निर्णयबाट स्वीकृत नै नगरी, अनिवार्य निर्णय गर्नुपर्ने स्थायी कमिटीलाई अवमूल्यन गरेको देखिने गरी र मनोमानी पजनी गरेको प्रष्ट देखिने गरी यस्तो निर्णय भएको हो नै भने पार्टीको आन्तरिक जीवन प्रणालीका लागि यो सकारात्मक संकेत होइन ।’

पार्टीको आन्तरिक प्रतिस्पर्धामा पक्ष÷विपक्षमा भएका कारणले पूर्वाग्रहवस किनारा लगाउने प्रवृत्ति जीवित राख्न प्रयास गरेकै हो भने परिस्थिति विस्फोटक बन्न सक्छ । संक्रमणकालीन व्यवस्थाहरूका नाममा जे पायो त्यही नगर्न र सिन्डिकेट नचलाउन नेतृत्वको ध्यानाकर्षण गर्न चाहन्छु भन्दै उनले आपत्ति जनाएका छन् ।

बादल निकट भनिएका कर्णाली प्रदेशका सचिव मायाप्रसाद शर्माले भने सो पद त्याग गरेका छन उने आफूलाई इन्चार्ज दिने भनेर नदिएको र आफूभन्दा जुनियर गोरखबहादु बोगटीलाई प्रदेशको अध्यक्ष दिइएको भन्दै पद अश्विकार गरेका हुन् ।

सम्बन्धित समाचार

निर्वाचनमा एमालेको पराजय अस्थायी हो : विद्यादेवी भण्डारी
निर्वाचनमा एमालेको पराजय अस्थायी हो : विद्यादेवी भण्डारी
  • २०७५ आश्विन ८, १०: २६

काठमाडौं । नेकपा एमालेकी वरिष्ठ नेता तथा पूर्वराष्ट्रपति विद्यादेवी भण्डारीले गत फागुन २१ गते सम्पन्न निर्वाचनमा पार्टीले व्यहोरेको पराजय अस्थायी...

जसपा नेपालका १८ जनप्रतिनिधिको पद रिक्त
जसपा नेपालका १८ जनप्रतिनिधिको पद रिक्त
  • २०७५ आश्विन ८, १०: २६

काठमाडौं । निर्वाचन आयोगले जनता समाजवादी पार्टी (जसपा) नेपालबाट स्थानीय तह निर्वाचन २०७९ मा निर्वाचित १८ जना जनप्रतिनिधिको पद स्वतः...

राष्ट्रपति पौडेलद्वारा काठमाडौं–तराई द्रुतमार्गको महादेवटार सुरुङ ‘ब्रेक थ्रु’
राष्ट्रपति पौडेलद्वारा काठमाडौं–तराई द्रुतमार्गको महादेवटार सुरुङ ‘ब्रेक थ्रु’
  • २०७५ आश्विन ८, १०: २६

काठमाडौँ । राष्ट्रपति रामचन्द्र पौडेलले राष्ट्रिय गौरवको आयोजना काठमाडौं–तराई/मधेश द्रुतमार्गअन्तर्गत मकवानपुरस्थित महादेवटार सुरुङको बुधबार ‘ब्रेक थ्रु’ गरेका छन् । ३...