‘झिङ्गेदाउ’ भदौं १७ गतेदेखि प्रदर्शनमा आउने

नयाँ विकल्प
प्रकाशित मिती: २०७९ श्रावण २२, २०: ५५

नयाँ विकल्प,

काठमाडौं – वरिष्ठ साहित्यकार भिमनिधि तिवारीको कृतिमा आधारित चलचित्र ‘झिङ्गेदाउ’ आगामी भदौ १७ गतेदेखि प्रदर्शनमा आउने भएको छ ।

चलचित्रमा पारिवारिक एकताको महत्वका साथै दाजु–भाइका बीच हुने अंशवण्डाबारे सामाजिक विषयवस्तुलाई समावेश गरिएको छ । वरिष्ठ निर्देशक ज्ञानेन्द्र देउजाले निर्देशन गरेको चलचित्र निर्माण सम्पन्न भएपछि त्यसका केही महत्वपूर्ण अंश आज प्रदर्शन गरिएको हो ।

यसअघि निर्देशक देउजाले महाकवि लक्ष्मीप्रसाद देवकोटाले लेख्नुभएको ‘मुनामदन’को निर्देशन गरेका थिए । वरिष्ठ छायाँकार विष्णु घिमिरे ‘कल्पित’ले छायांकन गरेको चलचित्रमा नायिका केकी अधिकारी, आँचल शर्मा, मुकुन भुसाल, कुशल विष्ट, हिउँमाला गौतम, प्रतीक्षा शाह चन्दलगायत कलाकारको मुख्य भूमिका रहेको छ ।

फिल्म क्र्यु नेपाल र कपनगढी सिनेमा प्रालिको संयुक्त लगानीमा उक्त चलचित्र करिब चार वर्षको समयावधि तथा रु दुई करोडको लागतमा निर्माण भएको हो ।