सिप मेलामा मोबाइल रिपेयरिङको माग बढि

नयाँ विकल्प विशेष संवाददाता
प्रकाशित मिती: २०८१ बैशाख २५, १६: २२

काठमाडौं । काठमाडौं महानगरले आयोजना गरेको सिप मेलामा १० विधाका ३० वटा पेसासँग सम्बन्धित तालिम चलिरहेका छन् ।

२९ वटा पेसा राखिएकोमा मोबाइल रिपेयरिङको अत्यधिक माग आएपछि यो पेसा थप गरिएको हो । यस्तै टेलरिङ (ड्रेस मेकिङ)मा संख्या धेरै भएपछि कक्षा थप गरिएको छ ।

सिप सिकेर स्वदेशमा काम गर्छु, नेपालमा रोजगार र स्वरोजगारका धेरै सम्भावना छन् भन्ने सोच विकास गर्न आवश्यक रहेको काठमाडौं महानगरपालिकाकी उपप्रमुख सुनिता डंगोलले बताएकी छिन् ।

मंगलबार बिहान सुरु भएका कक्षा, तालिम सञ्चालन हुने ठाउँ र तालिम व्यवस्थापनको निरीक्षणका क्रममा डंगोलले उक्त कुरा बताएकी हुन् ।

सहरी योजना आयोगका सदस्य इञ्जिनियर शैलेन्द्र झा, रोजगारी र आय वृद्धि, काठमाडौंको समृद्धि कार्यक्रमका फोकल पर्सन शान्ता पहाडी, रोजगार संयोजकहरू देवेन्द्र केसी, अजय पौडेलले तालिमसँग सम्बन्धित व्यवस्थापकीय पक्षमा जानकारी गराएका थिए ।

त्यस क्रममा प्रशिक्षार्थीहरूसँग अन्तरक्रिया गर्दै उपप्रमुख डंगोलले अपेक्षाका बारेमा जानकारी लिएकी थिइन । प्रशिक्षार्थीहरूले सिप विकासका विशिष्ट कक्षाहरूको अवसरको अपेक्षा राखेका थिए ।