
काठमाडौं : कप्तान सावित्रा भण्डारी (साम्बा)को ह्याट्रिकसहित नेपालले एएफसी महिला एसियन कप २०२६ छनोट प्रतियोगिताको दोस्रो खेलमा श्रीलंकालाई ८–० को फराकिलो अन्तरले पराजित गरेको छ । यस जितसँगै नेपालले समूह ‘एफ’मा लगातार दोस्रो जित निकाल्दै ६ अंक जोडेको छ ।
तास्केन्तस्थित बुन्योदकोर स्टेडियममा भएको खेलमा नेपालका लागि सावित्राले तीन गोल गरिन् । गीता रानाले दुई तथा निशा थोकर, रेखा पौडेल र पूजा रानाले समान एक–एक गोल गरे ।
नेपालले खेलको सुरुवातदेखि नै आक्रमक खेल प्रस्तुत गर्यो । खेलको सातौं मिनेटमा अनिता बस्नेतको कर्नरमा डिफेन्डर गीता रानाले हेडमार्फत नेपाललाई अग्रता दिलाइन् । २०औं मिनेटमा समीक्षाको क्रसमा अनिताले बल नियन्त्रणमा लिँदै सावित्रालाई पास दिइन्, जसलाई सावित्राले सजिलै गोलमा परिणत गरिन् ।
४२औं मिनेटमा रश्मी कुमारी घिसिङको कट ब्याकमा सावित्राले उत्कृष्ट भलीमार्फत व्यक्तिगत दोस्रो गोल गरिन् । त्यसपछि पहिलो हाफको इन्जुरी समयको १औं मिनेटमा सबिता राना मगरको क्रसमा हेड गर्दै सावित्राले ह्याट्रिक पूरा गरिन् । यससँगै सावित्राको राष्ट्रिय टिमका लागि कुल गोल संख्या ६४ पुगेको छ । नेपालले पहिलो हाफमै ४–० को स्पष्ट अग्रता बनाएको थियो ।
दोस्रो हाफको ५३औं मिनेटमा रश्मी घिसिङलाई डिबक्सभित्र लडाएपछि नेपालले पेनाल्टी पायो । पेनाल्टीमा गीता रानाले गोल गर्दै व्यक्तिगत दोस्रो सफलता हात पारिन् । ६२औं मिनेटमा अनिता बस्नेतको कर्नरमा निशा थोकरको हेडरले गोलको संख्या ६–० पुर्यायो ।
७८औं मिनेटमा सब्स्टिच्युट पूजा रानाको क्रसमा रेखा पौडेलले हेडमार्फत गोल गरिन् । त्यसपछि ८९औं मिनेटमा श्रीलंकाकी डिफेन्डर माहिस्का कुमुदिनीले क्लियर गर्न नसकेको बललाई पुजाले जाली चुमाउँदै नेपालका लागि आठौं गोल गरिन् ।
नेपालले यसअघि पहिलो खेलमा लाओसमाथि ९–० को फराकिलो जित निकालेको थियो । अब नेपालले शनिबार समूह चरणको अन्तिम र निर्णायक खेल घरेलु टोली उज्बेकिस्तानसँग खेल्नेछ ।
श्रीलंकाका लागि यो लगातार दोस्रो हार हो । पहिलो खेलमा श्रीलंका उज्बेकिस्तानसँग १०–० ले पराजित भएको थियो । दुई खेलमा गोल रहित तथा अंकविहीन श्रीलंका प्रतियोगिताबाट बाहिरिएको छ ।
३४ टोली सहभागी प्रतियोगितामा ८ समूह बनाइएका छन् । प्रत्येक समूहको विजेता टिमले २०२६ मा अष्ट्रेलियामा आयोजना हुने एएफसी महिला एसियन कपमा स्थान बनाउनेछ । आयोजक अष्ट्रेलिया, चीन, दक्षिण कोरिया र जापान भने पहिल्यै छनोट भइसकेका छन् ।
काठमाडौं । लैङ्गिक हिंसाविरुद्ध जनचेतना अभिवृद्धि गर्नुका साथै पीडितको संरक्षण र न्यायमा पहुँच सुनिश्चित गर्ने उद्देश्यले यस वर्ष पनि लैङ्गिक...
काठमाडौं, १ मंसिर । नेपाल पत्रकार महासंघले प्रेस तथा अभिव्यक्ति स्वतन्त्रताको रक्षा, पत्रकारको पेसागत सुरक्षा र श्रम अधिकार सुनिश्चित गर्न...
काठमाडौं । पशु सेवा विभागले काठमाडौं उपत्यकामा ‘पशु वधशाला र मासु जाँच ऐन, २०५५’ को औपचारिक कार्यान्वयन सुरु गरेको छ...