‘बालश्रम निवारण यायेत अभिमुखीकरण आवश्यक’

नयाँ विकल्प संवाददाता
प्रकाशित मिती: २०८२ असार ३१, २१: २३

येँ : श्रम, रोजगार नापं सामाजिक सुरक्षामन्त्री शरतसिंह भण्डारीं बालश्रम निवारण यायेत जनस्तरय् व्यापक अभिमुखीकरण यायेमाःगुलिइ बः बियादीगु दु ।

मन्त्रालयकय् थौं ‘राष्ट्रिय बालश्रम निवारण प्रतिवेदन २०८२’ पिकासें वय्कलं थुकिया निंतिं स्वापू दुपिनिगु भूमिका महत्त्वपूर्ण जूगु धयादिल ।

मन्त्री भण्डारीं स्थानीय तहय् दुपिं रोजगार संयोजकतय्त बालश्रम निवारणय् परिचालित यायेफइ धकाः धयादिल । थःम्हं मन्त्रालयया भाला कःघानाबलय् यानागु प्रतिबद्धताकथं बालश्रमया ख्यलय् जूगु उपलब्धि दुथ्याकाः प्रतिवेदन पिकाये फूगुलिं वय्कलं लसता प्वंकादिल ।

मन्त्रालयया सहसचिव प्रदीपकुमार कोइरालां थी थी मन्त्रालय व स्वापू दूगु निकायतय्सं बालश्रम निवारणया ख्यलय् जूगु कुतःतय्त छथाय् तयाः प्रतिवेदन पिहाँवःगु ध्वाथुइकादिल । ज्याझ्वःया नायः नापं सहसचिव डण्डुराज घिमिरें बालश्रमलिसे सम्बन्धित थी थी ज्याखँ कःघानातःगु उगु प्रतिवेदन थुगु ख्यःया उपलब्धि जूगु धयादिल ।

प्रतिवेदनय् लिपांगु इलय् बालश्रमय् स्वानाच्वंपिं मस्त, जोखिमपूर्ण ज्याय् स्वानाच्वंपिं व कृषि ख्यलय् स्वानाच्वंपिं पाः जूगु धयातःगु दु । आःतक देय्न्यंकया थी थी १० गू स्थानीय तह बालश्रममुक्त घोषणा जुइधुंकूगु दु ।