स्कुल विभागको टाउको दुखाइ अध्यक्षद्वयलाई – Naya Bikalpa
November 20, 2026, Friday      Epaper

स्कुल विभागको टाउको दुखाइ अध्यक्षद्वयलाई

काठमाडौ । सत्तारुढ नेपाल कम्युनिस्ट पार्टी (नेकपा) भित्र स्कुल विभागको जिम्मेवारी कसले लिने भन्ने बिषयलाई लिएर दोश्रो तहका नेताबीचको विवाद सार्वजनिक भएको छ ।

नेकपाका सचिवालय सदस्य तथा उपप्रधानमन्त्री इश्वर पोखरेल र अर्का सचिवालय सदस्य नारायणकाजी श्रेष्ठबीच हानथाप भएपछि अध्यक्षद्वय प्रधानमन्त्री केपी शर्मा ओली र पुष्पकमल दाहालसमेत सकसमा परेका छन् ।

नेकपाका शक्तिशाली विभागमध्ये स्कुल विभागलाई प्रशिक्षण, तालिम आदि दिने बैधानिक र औपचारिक निकायको रुपमा चिनिन्छ । दुबै नेताले विभागको जिम्मेवारी आफूले पाउनुपर्ने बताएपछि कसलाई दिने भन्ने निष्कर्षमा अध्यक्ष ओली र दाहाल पुग्न सकेका छैनन् । पार्टी एकता भएको १४ महिना वितिसक्दा पनि पार्टी एकताले पूर्णता नपाउँदा अवसर नपाउने कार्यकर्तामा निरासा छाउन थालेको छ ।

असारमा एकताको काम सक्ने भन्दै ओली र दाहालले घोषणा गर्दै आएका थिए । एकताको काम लम्बिनुको मुख्य कारण नै स्कुल विभागको नेतृत्व कसलाई दिने भन्ने भएको नेताहरु बताउँछन् । अहिले नेकपाका अध्यक्षद्वय ओली र प्रचण्ड यो विभागका कारण एकताको समय लम्बिनुभन्दा मध्यमार्गी बाटो खोज्नको लागि उपायका बारेमा छलफल चलाएका छन् ।

अध्यक्ष दाहालले स्कुल विभागको जिम्मेवारी लिन झलनाथ खनाललाई प्रस्ताव गरेको खनाल निकट एक नेताले बताए । खनालले भने प्रचण्डलाई आफू अध्ययन तथा अनुसन्धान प्रतिष्ठानको नै जिम्मा लिन तयार रहेको बताएका थिए । विवादको निकास निकाल्न सकस हुँदै गर्दा ओली र दाहालले स्कूल विभागको जिम्मेवारी आफै लिने उपाएको बारेमा पनि छलफल थालेका छन् ।

दुबै नेताहरुले आ–आफ्नो अडान नछोडेपछि विकल्पको रुपमा खनाललाई अगाडि ल्याउने सोचमा अध्यक्षद्धय थिए । नेकपामा ३२ वटा विभाग छन । जसमा तत्कालीन एमालेको भागमा १८ र माओवादी केन्द्रको भागमा १४ वटा विभाग परेका छन । जसमा संगठन विभाग, स्कुल विभाग लगायतका विभागहरु शक्तिशाली रुपमा लिइन्छ ।

संगठन विभाग सचिवालय सदस्य वामदेव गौतमले पाइसकेका छन् । स्कुल विभागमा विवाद बढेपछि अहिले खनाललाई जिम्मा दिएर पोखरेल र श्रेष्ठलाई अन्य विभागको जिम्मा दिने गरी तयारीमा जुटेका प्रचण्ड खनालको अस्वीकृतिसँगै निरास भएका छन् ।

केहिदिन पहिला प्रचण्ड निवास खुमलटारमा तत्कालीन माओवादी नेताहरु बसेर पोखरेललाई स्कुल विभागको जिम्मा कुनै पनि अवस्थामा दिनुहुन्न भन्ने निस्कर्षमा पुगेका थिए । उनीहरुले पार्टी एकता भइसकेपछि पनि पोखरेलले देशब्यापी कार्यक्रम गर्दै जनताको बहुदलिय जनबादलाई कुनैपनि हालतमा छोड्न नसकिने भन्दै बोलेका थिए ।

मदन भण्डारीले प्रतिपादन गरेको जनताको बहुदलिय जनबाद सिद्धान्तलाई तत्कालिन नेकपा एमालेले मार्गनिर्देशक सिद्धान्तको रुपमा लिएको थियो । एमाले र माओवादी एक भएपछि मध्यमार्गी बाटोको रुपमा जनताको जनबाद भन्ने शब्द राखिएको थियो । तर पार्टी एकता घोषणा भएको झण्डै एक बर्ष पुग्दै गर्दा पोखरेलले मदन भण्डारीको जनताको बहुदलिय जनबादलाई आफूहरुले आत्मासाथ गरेको छोड्न नसक्ने बताउँदै आएका थिए ।

त्यसैले पूर्वमाओवादीहरुले इश्वर पोखरेललाई स्कूल विभाग दिएमा जनताको बहुदलिय जनवादकै वकालत गर्ने भन्दै अध्यक्ष दाहाललाई समेत दबाब दिएका थिए । खनाल प्रधानमन्त्री, पार्टीको अध्यक्ष र पार्टी महासचिव समेत बनिसकेका छन् । खनाल एमालेमै हुँदा पनि जनताको बहुदलिय जनबादलाई अस्वीकार गर्ने नेता हुन ।

उनी नौलो जनबादको पक्षधर थिए । जुनबेला पाँचौ महाधिवेसनमा तत्कालिन महासचिव मदन मण्डारीले ल्याएको जनताको बहुदलिय जनबाद महाधिवेसनले पारित गरेको थियो । अध्यक्षद्वयले ल्याएको मध्यमार्गी बाटोमा सहमति भएमा खनाल स्कुल विभाग प्रमुख हुनेछन् ।
खनालले रोजेको अध्ययन अनुसन्धान प्रतिष्ठानको जिम्मा पोखरेललाई दिएर श्रेष्ठलाई भने पुरानै प्रचारप्रसार विभागको जिम्मेवारी दिने योजना अध्यक्ष ओली र खनालको रहेको छ ।

तर, प्रधानमन्त्री भइसकेको र पार्टीको दुई पटकसम्म नेतृत्व लिएको व्यक्तिलाई स्कूल विभागमा सिमित गरिनु हुन्न भन्दै युवा नेता घनश्याम भूषाल र अर्का नेता बेदुराम भूषालले सो विभाग दाबी गरेका छन् । भूषालले गुट नहेर्ने हो भने सो विभागमा आफू योग्य भएको दाबी गर्दै आएका छन् । भूषाल अहिले पनि देशका बिभिन्न भागमा नेकपाका नेता, कार्यकर्ता र शुभेच्छुकहरुलाई माक्र्सबादको प्रशिक्षण दिँदै आएका छन् ।

सम्बन्धित समाचार

हरिबोधिनी एकादशी आज मनाइँदै, तुलसी र विष्णुको विशेष पूजा गरिँदै
हरिबोधिनी एकादशी आज मनाइँदै, तुलसी र विष्णुको विशेष पूजा गरिँदै
  • २०७६ श्रावण १४, ०८: ५१

काठमाडौँ । कार्तिक शुक्ल एकादशीका अवसरमा आज तुलसीको पूजा आराधना गरी हरिबोधिनी एकादशी पर्व मनाइँदैछ । यस दिन तुलसी र...

जसपा नेपालका १८ जनप्रतिनिधिको पद रिक्त
जसपा नेपालका १८ जनप्रतिनिधिको पद रिक्त
  • २०७६ श्रावण १४, ०८: ५१

काठमाडौं । निर्वाचन आयोगले जनता समाजवादी पार्टी (जसपा) नेपालबाट स्थानीय तह निर्वाचन २०७९ मा निर्वाचित १८ जना जनप्रतिनिधिको पद स्वतः...

राष्ट्रपति पौडेलद्वारा काठमाडौं–तराई द्रुतमार्गको महादेवटार सुरुङ ‘ब्रेक थ्रु’
राष्ट्रपति पौडेलद्वारा काठमाडौं–तराई द्रुतमार्गको महादेवटार सुरुङ ‘ब्रेक थ्रु’
  • २०७६ श्रावण १४, ०८: ५१

काठमाडौँ । राष्ट्रपति रामचन्द्र पौडेलले राष्ट्रिय गौरवको आयोजना काठमाडौं–तराई/मधेश द्रुतमार्गअन्तर्गत मकवानपुरस्थित महादेवटार सुरुङको बुधबार ‘ब्रेक थ्रु’ गरेका छन् । ३...