महाअधिवेशनको प्रशिक्षणमा विज्ञको खोजी

पार्टीको नियमावली अझै आएन

भक्तपुर । नेपाली कांग्रेसको विधान अनुसार केन्द्रीय कार्य समिति र जिल्ला कार्य समितिले मात्र पूर्णता पाएपछि पार्टीको केन्द्रीय नीति, अनुसन्धान तथा प्रशिक्षण प्रतिष्ठान यतिवेला चार बर्षअघि चयन भएका महाधिवेशन प्रतिनिधिलाई प्रशिक्षण दिनमै व्यस्त देखिन्छ ।

पार्टी उपसभापति नै प्रतिष्ठानको संयोजक बन्ने बैधानिक व्यवस्था अनुसार उपसभापति विमलेन्द्र निधि यतिवेला देशब्यापी प्रशिक्षण कार्यक्रममा भाषण गर्ने र नेताहरुलाई भाषण गराउँदै हिँड्न थालेका छन् । प्रतिष्ठानले शनिबार मात्र पनि प्रदेश ३ को सात जिल्लाका महाधिवेशन प्रतिनिधिहरुको लागि भक्तपुरको बोडेमा प्रशिक्षण कार्यक्रम आयोजना गरेको थियो ।

प्रतिष्ठानले मध्यपुर ठिमी नगरपालिका ९, वोडेस्थित कृषि विकास वैंकको तालिम केन्द्रमा आयोजना गरेको दुई दिने प्रशिक्षण कार्यक्रमको संयोजन र व्यवस्थापन पार्टीको भक्तपुर जिल्ला कार्यसमितिले गरेको थियो ।

कांग्रेसको नयाँ विधान अनुसार हाल प्रदेश सभा, प्रतिनिधिसभा क्षेत्रिय समिति, प्रदेश सभा निर्वाचन क्षेत्रीय समिति, नगर वा गाउँपालिका समिति, वडा र समिति र टोल समिति गठन भइसकेको छैन । पार्टी केन्द्रीय कार्य समितिले नया विधानअनुसार पार्टीका संगठनलाई पूर्णता दिन निर्देशिका बनाए पनि सबै तहले पूर्णता पाएका छैनन् । निर्देशिकामा प्रदेश कार्य समितिको गठन सम्वन्धमा केही बोलेको पनि छैन ।

पार्टीमा महिला संघ, मगर संघ र मुस्लिम संघवाहेक कुनै पनि भातृ संस्थाले पूर्णता पाएका छैनन् । कांग्रेसको मेरुदण्ड भनेर चिनिएको नेपाल विद्यार्थी संघ आठ महिनादेखि विघटित छ । नेपाल तरुण दल तीन बर्षदेखि चार पदाधिकारीमा सिमिति छ ।

आदिवासी जनजाति संघ, किसान संघ जस्ता संगठनको महाधिवेशन नभएको १५ बर्ष भइसकेको छ । तर पार्टीको कुनै भातृ वा शुभेच्छुक संस्था परिचालन हुने अवस्था नआएपछि प्रशिक्षण प्रतिष्ठान महाधिवेशन प्रतिनिधिलाई प्रशिक्षण दिँदै हिँडेको छ ।

पार्टीको नेतृत्व चयन गर्ने र नेतृत्वमा पुग्ने हैसियत राख्ने महाधिवेशन प्रतिनिधिमा मात्र प्रशिक्षण सिमित गरेपछि प्रतिष्ठानको चौतर्फी आलोचना हुन थालेको छ । १० महिनाअघि सम्पन्न भएको महासमिति बैठकले निर्माण गरेको विधान कार्यान्वयनमा ल्याउन नेतृत्वलाई तीन महिना लागेको थियो । त्यस्तै, नियमावली पास गरेको दुई महिना भए पनि अझै कार्यान्वयनमा गएको छैन् ।

पार्टी केन्द्रीय कार्य समितिको असार २२ गतेको बैठकमा पेश भएको नियमावली मस्यौदा समिति एक सातापछि केन्द्रीय सदस्यहरुको सुझावलाई समेटेर परिमार्जन गरेर ल्याउने गरी पास भएको थियो । तर मस्यौदा समितिका सभापति रमेश लेखकको व्यस्तताका कारण केन्द्रीय कार्यसमितिले पारित गरेको पार्टीको नियमावली अझै कार्यान्वयमा आएको छैन ।

पार्टीको नियमावली बिना नै महाधिवेशन प्रतिनिधिलाई प्रशिक्षण दिइएको भन्दै प्रतिष्ठानको आलोचना पनि हुँदै आएको छ । पुरानो बिधान आनुसार गत बर्ष नै गठन भएको प्रतिष्ठानलाई नयाँ बिधान अनुसार गठन गरिएको छैन । बिधान विपरित गनठ भएको प्रतिष्ठानको बिषयमा केही केन्द्रीय सदस्यले आवाज उठाए पनि सभापति देउवाले कानमा तेल हालेर बसेपछि निधिको प्रशिक्षणको कार्यक्रमले निरन्तरता पाइरहेको छ ।

शनिबार प्रदेश ३ का १३ जिल्लामध्ये काठमाडौं, ललितपुर, भक्तपुर, काभ्रेपलाञ्चोक, सिन्धुपाल्चोक, दोलखा र रामेछापका महाधिवेशन प्रतिनिधिहरु मात्र सहभागी थिए । प्रदेश ३ का बाँकी ६ जिल्ला रसुवा, नुवाकोट, धादिङ, चितवन, मकवानपुर र सिन्धुलीका महाधिवेशन प्रतिनिधिका लागि भने मकवानपुरमा प्रशिक्षण आयोजना गरिने भएको छ ।

प्रदेश १ को धनकुटा र मोरङ, प्रदेश २ को जनकपुरधाम र वीरगञ्ज तथा सुदूरपश्चिम प्रदेशको कञ्चनपुरको भीमदत्त नगरपालिकामा महाधिवेशन प्रतिनिधिहरुका लागि केही समयपछि प्रशिक्षण मिति तय गरिने प्रतिष्ठानका सचिव मुक्ति आचार्यले जनाएका छन् ।

कांग्रेसले यसअघि गण्डकी प्रदेशको पोखरामा, कर्णालीका प्रदेशको सुर्खेतमा र पाँच नम्वर प्रदेशको बुटवलमा प्रशिक्षण कार्यक्रम सम्पन्न गरिसकेको छ । कांग्रेसले आगामी भदौ २४ गतेदेखि दोश्रो चरणको प्रशिक्षण कार्यक्रम संचालन गर्ने घोषणा गरिसकेको छ । यसैबीच ३ नम्बर प्रदेशको प्रशिक्षण कार्यक्रममा उपसभापति एवं प्रतिष्ठानका संयोजक विमलेन्द्र निधी, पूर्व सभासद् एवं नेतृ आरजु राणा, डा.गोबिन्द पोखरेल, हरिहर विरही, पुरुषोतम दाहाल, तारानाथ दाहाल लगायतले प्रशिक्षण दिएका थिए ।

उक्त प्रशिक्षण कार्यक्रममा उपसभापति एवं प्रतिष्ठानका संयोजकले धर्मनिरपेक्षताको बारेमा कुरा गर्दा हलभित्र निकै होहल्ला मच्चे पनि निधिले धर्मनिरपेक्ष र धार्मिक स्वतन्त्रता भन्ने शब्द एउटै भएको हुँदा कसैमाथि पनि धर्मको बारेमा भेदभाव नभएको बताएपछि होहल्ला शान्त भएको थियो । त्यसैगरी वरिष्ठ पत्रकार हरिहर विरहीको प्रशिक्षणलाई सहभागीहरुले बौद्धिक वर्गलाई मात्रै सम्बोधन गर्ने र लामो इतिहास पढाउनुभन्दा ग्रासरुटका कार्यकर्ताले बुझ्ने सरल र सहज खालको हुनुपर्ने बताए । त्यसैगरी नेतृ आरजु राणाको प्रशिक्षणलाई धेरै सहभागीले मन पराएको र भाषा शैली र प्रस्तुतिकरण राम्रो भएको बताएका थिए ।

नेतृ राणाले प्रशिक्षण दिइरहँदा हल निकै शान्त वातावरणमा रहेको थियो । ३ नं. प्रदेशका महाधिवेशन प्रतिनिधिहरुले अधिकांशले नेताको भाषण भन्दा विज्ञको तालिम उपयुक्त हुने सुझाव दिएका थिए ।

उक्त प्रशिक्षण कार्यक्रम नेपाली काँग्रेस भक्तपुर जिल्ला कार्यसमितिका सभापति दुर्लभ कुमार थापाको सभापतित्वमा सम्पन्न भएको थियो भने सहभागीहरुलाई खाना, बस्नको समेत राम्रो प्रबन्ध भक्तपुर काँग्रेसले नै गरेको थियो । भक्तपुर काँग्रेसले भातृ संस्था नेपाल महिला संघ, नेपाल तरुण दल, नेपाल विद्यार्थी संघ लगायत काँग्रेस जिल्ला कार्यसमिति प्रचार विभाग समेतले कार्यक्रमलाई सफल बनाउन लागि परेका थिए ।