स्वास्थ्य सुरक्षा सुनिश्चित गर्न दक्षिण पूर्वी एसियाली ११ राष्ट्रका स्वास्थ्यमन्त्रीले जनाए १२ बुँदे प्रतिबद्धता

नयाँ विकल्प
प्रकाशित मिती: २०७८ भाद्र २२, २२: ३५

नयाँ विकल्प

काठमाडौं – दक्षिण पूर्वी एसियाको क्षेत्रीय संगठनको बैठकमा ११ देशका स्वास्थ्य मन्त्रीले संयुक्त रुपमा १२ बुँदे घोषणापत्र जारी गरेका छन् ।

सोमबार सुरु भएको बैठकको दोस्रो दिन स्वास्थ्य मन्त्रीहरुले घोषणा पत्र सार्वजनिक गरेका हुन् ।

एसियाली देशहरुले स्वास्थ्य प्रणालीलाई पुनः अभिमुखीकरण र सबलीकरण गर्ने प्रतिबद्धता घोषणा पत्रमार्फत जनाएका छन् ।

कोरोना महामारीबाट पाठ सिक्दै र बिरलैमात्र आउने यस्तो अवसरको उपयोग गर्दै विश्व स्वास्थ्य संगठनको दक्षिणपूर्वी एसिया क्षेत्रका देशहरुले स्वास्थ्य सुरक्षा सुनिश्चित गर्न, स्वास्थ्यमा सर्वव्यापी पहुँच प्राप्त गर्न र स्वास्थ्य सम्बन्धी दिगो विकास लक्ष्य प्राप्त गर्नका लागि स्वास्थ्य प्रणालीहरुको उत्थानशीलतालाई थप सबलीकरण गर्ने प्रतिबद्धता जनाएका हुन् ।

घोषणा पत्रमा महामारीको दौरानमा र महामारी पश्चातको समयमा अत्यावश्यक स्वास्थ्य सेवाहरु र जनस्वास्थ्यका कार्यक्रमहरु सुचारु राख्नका लागि समुदायहरुलाई अझ संलग्न गराउने र समुदायहरुको सशक्तिकरण गर्ने प्रतिवद्धतासमेत जनाइएको छ ।

यस्तै, सदस्य राष्ट्रहरुले प्राथमिक स्वास्थ्य स्याहारको तहमा मानसिक स्वास्थ्य तथा अन्य रोग लगायतका नसर्ने रोगहरुलाई समाहित गर्ने, प्राथमिक स्वास्थ्य स्याहारका सेवाहरुका लागि राष्ट्रिय गुणस्तर मापदण्डहरु स्थापना गर्ने प्रतिबद्धता पनि जनाएका छन् ।