१४ भन्दा बढी देशका नागरिक मन्किपक्स संक्रमित

नयाँ विकल्प संवाददाता
प्रकाशित मिती: २०७९ जेष्ठ ११, ११: ०१

नयाँ विकल्प,

काठमाडौं – पश्चिम युरोप लगाएतका देशमा मंकिपक्सको संक्रमण फैलिदै गएको छ। गैरआवासीय नेपाली संघको विश्व स्वास्थ्य समितिले मंकिपक्सको सम्भावित फैलावटबारे विश्वभरका नेपालीलाई सचेत गराउँदै प्रेस विज्ञप्ति जारी गरेको छ । विज्ञप्तिमा विशेषगरी पश्चिमी युरोपमा रहेका नेपालीलाई मंकिपक्स भाइरल संक्रमणबाट बच्न सतर्क रहन सुझाव दिइएको छ ।

पश्चिम युरोपका मात्र नभएर अष्ट्रेलिया, संयुक्त राज्य अमेरिकाकालगायत १४ भन्दा बढी देशका नागरिकमा मन्किपक्सका संक्रमित भेटिएको छ । पश्चिम युरोप र बेलायतमा सबैभन्दा धेरै केसहरू भेटिएका छन् । पोर्चुगल, स्वीडेन, नेदरल्याण्ड्स, अस्ट्रिया, बेल्जियममा पनि संक्रमितहरु भेटिएका छन् ।

मंकिपक्सको लक्षण ज्वरो आउने, टाउको दुख्ने, मांसपेशी दुख्ने र थकान देखिने रहेका छन् । ज्वरो देखापरेको १ देखि ३ दिनभित्र रोगीको छालामा रेसा देखा पर्ने, रेसा प्रायः अनुहारबाट सुरु हुने र त्यसपछि शरीरका अन्य भागहरूमा फैलिदै जाने जस्ता लक्ष्ण रहेका छन् । त्यसपछि रेसाहरु पानी भरिएको फोकामा परिणत हुन्छन् । मंकिपक्सको इन्क्युबेशन अवधि सामान्यतया ७ – १४ दिन छ । मंकिपक्सको लागि अहिलेसम्म कुनै विशेष उपचार नभएको जनाइएको छ ।