- अनामनगर काठमाडौँ
- infobikalpa21@gmail.com
लुम्बिनी, १० चिल्लाथ्व : विश्व शान्तिया कामना यासें बुद्धजन्मस्थल लुम्बिनीइ न्हय्द्वः दीप प्रज्ज्वलन याःगु दु । प्यक्वःगु त्रिपिटक पाठ समारोहया समापन लिपा शनिबाः सनिलय् कन्द्रीय नहरया मध्यब्वय् च्वंगु लम्बिनी स्क्वायरय् न्हय्द्वः दीप प्रज्ज्वलन याःगु खः ।
धम्मकाय फाउन्डेसनं भिक्षु–भिक्षुणी, लामा गुरु, आनी, उपासक उपासिका व प्रवजित जूपिं न्यासः अल्पकालीन भिक्षुपिनिगु दथुइ शान्ति व सौहर्दताया निंतिं दीप प्रज्ज्वलन याःगु खः । नेपाःया ध्वाँय्यात बिचय् लाकाः धम्मचक्रया आकार वइगु कथं याःगु दीप प्रज्ज्वलनया अखिल नेपाल भिक्षु महासंघया नायः धम्मशोभन महास्थविरं उलेज्या यानादीगु खः । लुम्बिनी विकास कोषया न्वकू डा ल्हारक्याल लामां बुद्धजन्मस्थल लुम्बिनीइ दीप प्रज्ज्वलन यानाः विश्व शान्ति व प्राणी जगत्या कल्याणया कामना यायेगु थःम्हं हे महत्वंजाःगु धयादिल । वय्कलं बुद्धया उपदेशयात थजागु हे आध्यात्मिक ज्याझ्वःतपाखें हलिंन्यंकं न्यंकेमाःगु खँय् बः बियादिल ।
ज्याझ्वलय् थाईधम्मकायया सल्लाहकार डा अदिसकं बुद्धया शिक्षां विश्वबन्धुत्व व छवाःयात बः ब्यूगु धासें दीपं दुने व पिनेया ज्ञानयात प्रतिविम्बन याःगु धयादिल । अथे हे, ज्याझ्वलय् संस्कृति पर्यटन नापं नागरिक उड्डयनमन्त्रीया सल्लाहकार रोशनी गिरी, अखिल नेपाल भिक्षु महासंघया छ्याञ्जे भिक्षु निग्रोध महास्थविर, लुम्बिनी बौद्ध विश्वविद्यालयया उपकुलपति डा सुवर्णलाल बज्राचार्यं दीपया जः थें बुद्धया उपदेशं नं खिउँयात चिइका यंकीगु धयादिल ।
त्रिपिटक पाठ सिधल
बुद्धजन्मस्थल लुम्बिनीइ न्ह्याःगु प्यन्हूयंकंया प्यक्वःगू त्रिपिटक पाठ सिधःगु दु । अखिल नेपाल भिक्षु महासंघया ग्वसालय् व लुम्बिनी विकास कोषनापं थी थी संस्थाया मंकाः ग्वसालय् लुम्बिनीया मायादेवी देगः परिसरय् त्रिपिटक पाठ याःगु खः ।
त्रिपिटक पाठया शनिबाः लुम्बिनी प्रदेशया मुख्यमन्त्री चेतनारायण आचार्यं समापन यानादिल । समापन समारोहयात सम्बोधन यासें मुख्यमन्त्री आचार्यं बुद्धया उपदेशयात हलिंन्यंकं न्यंकेत इनाप यानादिल । वय्कलं बुद्धया शिक्षा व उपदेशयात मनंतुनाः शान्ति, करुणा व सहअस्तित्वया भावना न्यंके फइगु धयादिल ।
ज्याझ्वलय् लुम्बिनी विकास कोषया उपाध्यक्ष डा ल्हारक्याल लामां लुम्बिनी बुद्धजन्मस्थल जूगुलिं हलिंन्यंकंया बोद्धमार्गीतय्या निंतिं आस्थाया केन्द्र जूगु व थन वइबले बुद्धयात तप्यंकः नापलाःथें जुइगु धयादिल ।
ज्याझ्वलय् अखिल नेपाल भिक्षु महासंघया नायः भिक्षु धम्मशोभन महास्थविरं भगवान् बुद्धया उपदेश वैज्ञानिक व ईकथंया जूगु धयादिल । वय्कलं बुद्धया उपदेशयात प्यन्हूयंकं बुद्धजन्मस्थलय् पाठ यानाबले उकिं सकारात्मक ऊर्जा ब्यूगु धयादिल ।
अथे हे, लुम्बिनी विकास कोषया सदस्यसचिव सानुराजा शाक्यं त्रिपिटक पाठं लुम्बिनीया पर्यटन प्रवद्र्धननापं बुद्ध शिक्षायात अन्तर्राष्ट्रियकरण यायेत महत्वपूर्ण योगदान ब्यूगु धयादिल । ज्याझ्वलय् इन्टरनेसनल त्रिपिटक च्यान्टिङ कमिटीया संस्थापक उपासिका वाङ्मो डिक्सीं बुद्धया उपदेश लुम्बिनीइ हे च्वनाः पाठ याये खंगु थःगु जीवनया हे अमूल्य उपलब्धि जूगु धयादिल ।
ज्याझ्वलय् अखिल नेपाल भिक्षु महासंघया छ्याञ्जे निग्रोध महास्थविर, लुम्बिनी होटल व्यवसायी संघया वरिष्ठ न्वकू लीलामणि शर्मानापं नं बुद्धया उपदेश हलिंन्यंकं न्यंकेत थुजागु ज्याझ्वः महत्वपूर्ण जूगु धयादिल । उगु ज्याझ्वलय् त्रिपिटक ज्याझ्वःयात ग्वाहालि यानादीपिंत हनागु धकाः महासंघया प्रचार कजि भिक्षु बिमलो महास्थविरं धयादिल ।
गौतम बुद्धं ४५ दँतक मदिक्क बियादीगु ज्ञां व धर्म देशनायात त्रिपिटकय् संग्रहित यानातःगु दु । त्रिपिटक पाठ समारोहय् भिक्षु भिक्षुणी, लामा, आनी, उपासक उपासिकानापं प्यसःसिबें अप्वःसिनं ब्वति काःगु खः ।
धनकुटा : नेपाली कांग्रेसकी सहमहामन्त्री डा. डिला संग्रौलाले पार्टीको निर्धारित महाधिवेशन आगामी असोजमै सम्पन्न हुने बताउँदै त्यसको तयारीस्वरूप देशभर क्रियाशील...
काठमाडौं : शिक्षा तथा खेलकुदमन्त्री सस्मित पोखरेलले राष्ट्रिय परीक्षा बोर्डले नतिजा समयमै प्रकाशन गर्न कुनै हतार नगरेको स्पष्ट पारेका छन् ।...
चितवन । राष्ट्रिय स्वतन्त्र पार्टी (रास्वपा) ले दोस्रो चरणअन्तर्गत पार्टी पदाधिकारी निर्वाचनको तालिका सार्वजनिक गरेको छ । केन्द्रीय निर्वाचन आयोगका...
