गणतन्त्रयात संस्थागत यायेत रासस फोटो सफू उपयोगी : न्हापांम्ह राष्ट्रपति डा यादव

नयाँ विकल्प संवाददाता
प्रकाशित मिती: २०८२ बैशाख ८, २०: २९

येँ : गणतन्त्र नेपाःया न्हापांम्ह राष्ट्रपति डा रामबरण यादवं गणतन्त्रयात संस्थागत यायेत रासस फोटो सफू महत्वपूर्ण भूमिका म्हितीगु भलसा प्वंकादीगु दु ।

यलया भैँसेपाटीइ च्वंगु निवासय् थौं राष्ट्रिय समाचार समिति (रासस) पाखें पिथंगु ‘रासस फोटो सफू : गणतन्त्रया ६ दँ’ लःल्हानाकायेगु झ्वलय् न्हापांम्ह राष्ट्रपति डा यादवं गणतन्त्र स्थापनालिपा छुं मजू धाइपिंत किपाः सङ्गहित सफू सेल्लाःगु लिसः जूगु धयादिल ।

वय्कलं गणतन्त्रलिपाया इलय् ‘मुलुकय् विकास निर्माणया अवस्था गथे जू, प्रगति छु छु जुल, सांस्कृतिक पक्ष छु अवस्थाय् दु व उगु सम्पादनया संरक्षण व निरन्तरता’ लिसेंया विषयवस्तुयात कःघानाः तयार याःगु फोटो सफू तसकं उपयोगी जूगु धारणा प्वंकादिल।

प्रथम राष्ट्रपति डा यादवं धयादिल, “राससं पिथंगु फोटो सफू थःथवं हे महत्वपूर्ण जू, सफुतिं केवल किपाः , संस्कृति व विकास निर्माणया बारे जक मखु, न्हूगु व पुलांगु पुस्तातय्त स्वायेगु ज्या नं याःगु दु । थैंकन्हय्या न्हूगु पुस्तातय्त इतिहासया थी थी कालखण्डया रीतिरिवाज, चालचलन व विकास निर्माणलिसे सम्बन्धित ज्याखँयात तकं जानकारी बिइत थ्व सफू तसकं महत्वपूर्ण दस्तावेदकथं स्थापित जुइ ।”

फोटो सफू लःल्हानादिसें राससया कार्यकारी अध्यक्ष धर्मेन्द्र झां गणतन्त्र वयेधुंकाःया उपलब्धिलिसें विकास निर्माणया किपाः बिइगु फोटो सफू गणतन्त्रया संस्थागत विकासया पक्षय् उपयोगी जुइगु भलसा प्वंकादिल।

गणतन्त्र दिवसया झ्वलय् राससं वंगु निदँ ग्वसाःग्वःगु प्रदशर्नीइ तयातःगु किपाःत कःघानाः सफू पिथंगु जानकारी बियादिसें कार्यकारी अध्यक्ष झां थ्व स्वयां न्ह्यः थें छुं नं छगू विषयकय् केन्द्रित जुयाः किपाः प्रदशर्नी थेंजाःगु रचनात्मक ज्याझ्वयात निरन्तरता बिइगु धयादिल ।

उगु सफुती देय्या दक्व जातजाति, भाषाभाषी, भूगोल, धर्म, संस्कृति व पूर्वाधार निर्माणया ख्यलय् जुयाच्वंगु ज्याखँतय्त कःघानाः ९० फोटो पत्रकारतय्सं काःगु सच्छि व ८२ गू किपाः दुथ्याकातःगु दु ।

सफू लःल्हायेगु ज्याझ्वलय् राससया महाप्रबन्धक सिद्धराज राई, राससया वरिष्ठ कार्यकारी व्यवस्थापक शीतलप्रसाद महतो, राष्ट्रिय कर्मचारी सङ्गठन राससया नायः प्रेमप्रसाद उपाध्याय व फोटो पत्रकार विकल्प दाहालया नं ब्वति दूगु खः ।

सम्बन्धित समाचार

बुद्ध जयन्तीकै दिन भत्काइयो गुम्बा

२०८२ बैशाख ८, २०: २९

काठमाडौं : खोला किनारका अव्यवस्थित बस्ती हटाउने सरकारी अभियानअन्तर्गत शुक्रबार बिहान बल्खु–टेकु आसपासका क्षेत्रमा डोजर चलाइएको छ । सोही क्रममा बल्खुस्थित साङ्गे...