मातातीर्थ आयुर्वेद व वैकल्पिक चिकित्सालयय् शल्यक्रिया न्ह्यात

नयाँ विकल्प संवाददाता
प्रकाशित मिती: २०८२ बैशाख २५, २१: १८

येँ : चन्द्रागिरि नगरपालिका–८ य् च्वंगु मातातीर्थ आयुर्वेद व वैकल्पिक चिकित्सा अस्पतालय् शल्यक्रिया सेवा न्ह्याकूगु दु । स्थानीय तहं सञ्चालन याःगु उगु अस्पतालय् सितिकं शल्यक्रिया सेवा न्ह्याकूगु खः ।

चन्द्रागिरि नगरपालिकां सञ्चालित उगु अस्पतालं पञ्चकर्म व क्षारसुत्र सेवायात अझ गुणस्तरीय दयेकेत शल्यक्रिया सेवा सञ्चालनय् हःगु धकाः धाःगु दु । थ्व अस्पताल सितिकं शल्यक्रिया सेवा न्ह्याकूगु न्हापांगु अस्पताल जूगु धाःगु दु ।

नगरपालिकाया आन्तरिक स्रोेतं थ्यंमथ्यं झिगू लखय् अस्पतालया शल्यक्रिया कक्ष व शल्यक्रिया लिपा ल्वगित तयेगु खाता निर्माण याःगु अस्पतालया प्रमुख डा नारायण आचार्यं जानकारी बियादिल ।

चन्द्रागिरि नगरपालिकाया प्रमुख घनश्याम गिरीं शल्यक्रिया कक्षया थौं शुभारम्भ यानादिसें नगरं ‘एलोपेथिक’ उपचार व आयुर्वेद चिकित्सा निगुलिं सेवायात छकलं न्ह्याकाः ‘स्वस्थ नगर व स्वस्थ नगरवासी’ दयेकेगु तातुना कथं सेवायात उच्च प्राथमिकता बियातःगु धकाः धयादिल ।

चन्द्रागिरि–८ या वडानायः प्रल्हाद रिजालं वइगु इलय् अस्पतालया सेवा तब्याकीगु जानकारी बियादिल । ज्याझ्वलय् नगर प्रवक्ता कृष्णप्रसाद खड्गी, चन्द्रागिरि–१५ या वडानायः नापं सामाजिक विकास समितिया कजि घनश्याम लुइँटेल, चन्द्रागिरि–१३ या वडानायः श्रीकृष्ण खत्रीलिसेंया ब्वति दूगु खः ।

नगरपालिकाया प्रमुख प्रशासकीय अधिकृत सुरेन्द्र थापा मगरं मातातीर्थ आयुर्वेद व वैकल्पिक चिकित्सा अस्पतालया सेवायात अझ तब्याकेत नगरं उच्च प्राथमिकता बियाः योजनाबद्ध ज्या याइ धकाः धयादिल ।

अस्पतालया प्रमुख डा आचार्यं शल्यक्रिया कक्ष सञ्चालन जूगुलिं अस्पतालं थप विशेषज्ञ सेवा नं बिइगु लँपु चाःगु खँ न्ह्यथनादिल । वय्कःया कथं अस्पतालय् पञ्चकर्म सेवाअन्तर्गत पाइल्स, फिस्टुला व फिसरया शल्यक्रिया जुइ । वय्कलं धयादिल, “जिमिसं न्हापांगु चरणय् वाःया छन्हु शल्यक्रियाया व्यवस्था यानागु दु, ल्वगितय् चाप व मागया आधारय् छसिंलाक्क न्हियान्हिथं शल्यक्रियाया व्यवस्था यानावनेगु योजना दयेकागु दु । ”

अस्पतालं न्हिंन्हिं बहिरङ्ग सेवा (ओपिडी) व वाःया छन्हु विशेषज्ञ सेवा बियावयाच्वंगु दु । पञ्चकर्मअन्तर्गत (बमन, बिरेचन, वस्तिकर्म, नश्य कर्म व रक्तमोक्षण) पूर्व कर्मया थी थी सेवा अस्पतालं बियावयाच्वंगु प्रमुख डा आचार्यं जानकारी बियादिल । वय्कःया कथं अस्पतालया थःगु हे जडीबुटी उद्यान नं दु ।

प्रमुख डा आचार्यं महिनावारी स्वच्छता, ल्हाः सिलेगु अभ्यास, प्राथमिक उपचारसम्बन्धी अभिमुखिकरण, किट वितरण, कापःया प्याड दयेकेगु अभ्यास, जनरल नापं आयुर्वेद मोबाइल हेल्थ शिविरलिसें सेवा सञ्चालन जुयाच्वंगु नं कनादिल । वइगु इलय् प्रभावकारी व थप गुणस्तरीय सेवाया निंतिं योजनाबद्ध कथं ज्या यानावनेगु धकाः वय्कलं धयादिल ।