‘बर्खायामय् मेलम्चीया लः येँय् नियमित वितरण जुइ’

नयाँ विकल्प संवाददाता
प्रकाशित मिती: २०८२ असार ३, २०: ३३

अम्बास्थान : खानेपानीमन्त्री प्रदीप यादवं थुगुसीया बर्खायामया इलय् मेलम्चीया लः नियमित कथं येँया छेँखा पतिकं वितरण जुइ धयादीगु दु ।

सोमबाः मेलम्चीया रिबर्मा खुसिइ निर्माण याःगु खानेपानी ट्याङ्कीया स्थलगत अनुगमन लिपा वय्कलं वा वइगु इलय् नं येँय् यचुगु त्वनेगु लः मदिक्कं आपूर्ति जुइ धयादिल ।

वय्कलं धयादिल, “येँय् त्वनेगु लः वितरणया निंतिं रिबर्मा खुसिइ निर्माण यानागु खानेपानी ट्याङ्कीया ताःलाक परीक्षण जूगु दु । बर्खायाम न्ह्याःलिसें पिहांवइगु जोखिमयात स्वयाः वैकल्पिक उपायकथं रिबर्मा खुसिया लः मेलम्चीया सुरुङमार्ग जुकाः येँय् आपूर्ति यायेगु व्यवस्था यानाःगु दु ।”

बर्खायामय् रिबर्माया लः मेलम्चीया सुरुङमार्गपाखें छ्वइगु जूगुलिं आः मदिक्कं मेलम्चीया लः दच्छियंकं स्वनिगलय् वितरण यायेगु मन्त्री यादवं धयादिल । वय्कलं धयादिल, “थ्व व्यवस्थां स्वनिगलय् त्वनेगु लःया समस्या स्थायी कथं ज्यनीगु अपेक्षा यानाःगु दु । आः वइगु दिनय् येँय् च्वंपिंसं बर्खाय् लःया निंतिं सास्ति फय्माली मखु । जिमिसं जनताया प्राथमिकता थुइकाः जिम्मेवारीकथं ज्यंकेत मालाच्वनाःगु दु ।”

रिबर्माया लः परीक्षण यायेधुंकाः वा वइगु इलय् मेलम्चीया लः वितरणय् पंगः वइगु परम्परायात त्वाथलाः बर्खायामय् नं येँय् नियमित कथं लः वइगु सुनिश्चित जूगु मन्त्री यादवं धयादिल ।

वाः वइगु इलय् मेलम्चीया लः येँय् पथान्तरण याये मफइगु अवस्थाय् मेलम्चीया हे टनेलपाखें रिबर्मां न्हि न्यागूनिसें न्हय्गू क्वःति लिटर लः पथान्तरणया ह्वःताः दूगु अनुगमन लिपा मेलम्ची खानेपानी विकास समितिया कार्यकारी निर्देशक लिसें इञ्जिनियर रत्नप्रसाद लामिछानें धयादिल ।

वय्कलं धयादिल, “थुकिया निंतिं माःगु फुक्कं कथंया भौतिक संरचना तयार जुइ धुंकूगु दु । आः उगु खुसिइ दूगु लः सुरुङपाखें येँय् पथान्तरणया ताःलाक्क परीक्षण यानागु दु । आः वाः वइगु इलय् तकं येँय् लःया आपूर्ति बन्द जुइमखु ।”

न्हापा न्हापा बर्खा व खुसिबाःया हुनिं मेलम्ची सुरुङ बन्द यायेमाःगु इतिहासयात ध्यानय् तयाः थुगुसी प्रविधि व पूर्व तयारीइ विशेष ध्यान बियागु कार्यकारी निर्देशक लामिछानें धयादिल ।

मेलम्ची आयोजनाया प्राविधिक, सुरक्षाकःमि व आपूर्ति पुचःत थन २४ घौ हे खटे जुयाच्वंगु दुसा खुसिबाः, चलः लिसें मनसुनजन्य विपद्या जोखिमयात बिचाः यानाः सुरुङमार्ग व वितरण प्रणालीया मर्मत लिसें सुरक्षा बल्लाकूगु दु । विसं २०७८ या खुसिबाःलं मेलम्चीया मुहानय् याःगु क्षति लिपा बर्खायामया इलय् नियमित कथं त्वनेगु लः या आपूर्तिइ पंगः वयाच्वंगु खः ।