बजेट फक्व सन्तुलित जू : प्रधानमन्त्री

नयाँ विकल्प संवाददाता
प्रकाशित मिती: २०८२ असार १०, २१: २८

येँ : प्रधानमन्त्री केपी शर्मा ओलीं सरकारं हःगु बजेट फयांफक्व सन्तुलित जुइक हःगु अवगत यानादिसें वइगु इलय् माग व आपूर्तिदथुइ सन्तुलत दयेकेत थप कुतः याइगु धयादीगु दु ।

प्रतिनिधिसभाया थौंया बैठकय् विनियोजन विधेयक नापं खर्च कटौतीया प्रस्तावया सम्बन्धय् राष्ट्रपतिया ज्याकुथि, उपराष्ट्रपतिया ज्याकुथि, प्रधानमन्त्री नापं मन्त्रिपरिषद्या ज्याकुथि व अन्तर्गतया थी थी निकायलिसे सम्बन्धित सहलहय् थंगु न्ह्यसःया लिसः बियादिसें प्रधानमन्त्री ओलीं राज्यया माक्व क्षमता मदयाः बजेटय् फुक्क सांसदत सन्तुष्ट जुइगु स्थिति मवःगुलिं वइगु इलय् सन्तुलन दयेकेगु कुतः याये धकाः धयादिल ।

“झीत याकनं व यक्व थासय् विकास माःगु दु तर बजेट म्ह्वः जक दु । उकिं बजेटय् फुक्क सांसद सन्तुष्ट जुइ मफइगु स्थिति जुइफु । माग व आपूर्तिया असन्तुलन जुइकेत वइगु इलय् ध्यान बिइ,” प्रधानमन्त्री ओलीं धयादिल, “झीत लगानीया आवश्यकता दु, थुकिया नितिं निजी ख्यः व वैदेशिक लगानी हयेमाःगु दु । लगानीया आवश्यकता, विश्लेषण व योजनाया नितिं लगानी बोर्डं प्रभावकारी ज्या याइ ।”

प्रधानमन्त्री ओलीं संसद् जनताया बलिदान, सङ्घर्ष व म्हगसयात पूवंकेगु थाय् जूगुलिं सदनय् लोकतन्त्र व राष्ट्रियतायात बःमलाकीगु कथंया याउँगु टिप्पणी मयायेत इनाप यानादिल । वय्कलं दयाच्वंगु व्यवस्थायात अझ प्रभावकारी दयेकेगु कथं संविधानया संशोधनय् सरकार वनीगु जूगुलिं संविधान व प्रणालीया हेपे यायेगु कथंया खँ मयायेत इनाप यानादिल ।

“थ्व प्रणाली व संविधानया रक्षा याये । थुकिया कार्यान्वयन यानाः मुलुकयात समृद्ध नेपाः सुखी नेपाःमिया गन्तव्य पूवंकेगु खँय् सरकार न्ह्याःवंगु दु । थुकिइ फुक्क ढुक्क जूसां ज्यू”, प्रधानमन्त्री ओलीं धयादिल, “जिं जित ब्वः ब्यूगु व हेपे याःगु सहः यायेफु तर सहिद, जनताया बलिदान व दयाच्वंगु व्यवस्थायात हेपे याःगु सह यायेमखु । संसद् जनताया बलिदानया हिस्यायेगु व प्रणालीयात हेपे यायेगु थाय् जुइफइमखु ।”

प्रधानमन्त्री ओलीं राष्ट्रिय योजना आयोगया योजना बैङ्कया व्यवस्था यानाः ३ क्वति स्वयाः म्ह्वःया आयोजना मतःगु नीति तर्जुमा याःगु कनादिसें वइगु इलय् थुकिया प्रभावकारी कार्यान्वयन यायेत बः बिइ धकाः धयादिल ।

राज्यया दक्व निकायतय्त विकास निर्माण व सुशासनया नितिं प्रभावकारी जुइक ज्या यानाः जनअपेक्षाकथं सम्मुनतिया लँपुइ न्ह्याकेत सरकारं कुतः यानाच्वंगु ध्वाथुइकादिसें सरकारयात सुयागुं नं विरुद्ध छुं नं कासा म्हितेगु फुर्सद मदुगुलिं कासा म्हितल धइगु कथंया प्रचार मयायेत इनाप यानादिल ।