ऊर्जा सुरक्षा आधुनिक जीवनया आधारभूत आवश्यकता : मन्त्री खड्का

नयाँ विकल्प संवाददाता
प्रकाशित मिती: २०८२ असार १२, २१: ३३

येँ : ऊर्जा, जलस्रोत नापं सिँचाइमन्त्री दीपक खड्कां ऊर्जा सुरक्षा आधुनिक जीवनया आधारभूत आवश्यकता जूगु धयादीगु दु ।

चीनया जेझियाङ प्रान्तया निङ्बो शहरय् थौं ग्वसाःग्वःगु शङ्घाई ग्वाहालि सङ्गठन (एससिओ)या दुजः देय्तय्गु न्याक्वःगु ऊर्जामन्त्रीस्तरीय बैठकया ‘उच्च–गुणस्तरीय ऊर्जा विकासया नितिं नीति नवप्रवर्तन’सम्बन्धी सत्रय् थःगु धारणा तसें मन्त्री खड्कां ऊर्जा सुरक्षायात आधुनिक जीवनया आधारभूत आवश्यकता धयाः क्षेत्रीय सहकार्य, लगानी व नीतिगत नवप्रवर्तन यायेमाःगु न्ह्यथनादिल । ऊर्जा थौंया विकल्प मखु, जीवनया नितिं अक्सिजन थें हे आवश्यक विषय जूगु न्ह्यथनादीगु खँ मन्त्री खड्काया सचिवालयं धाःगु दु ।

मन्त्री खड्कां नेपालं लिपांगु न्यादँय् विद्युत् उत्पादन निदुगं दयेकूगु, थ्यंमथ्यं ९९% जनतातय्त विद्युतया पहुँचय् थ्यंकूगु व आः ९५% स्वयां अप्वः विद्युत् उत्पादन नवीकरणीय ऊर्जाया स्रोतपाखें जुयाच्वंगु खँ न्ह्यथनादिल ।

भारतलिसे १३२ केभी नापं वस्वयां म्ह्वः भोल्टेज स्तरया यक्व प्रसारण लाइनलिसें ४०० केभी ढल्केवर–मुजफ्फरपुर प्रसारण लाइन सञ्चालन जुयाच्वंगु मन्त्री खड्कां कनादिल । अथे हे, बङ्गलादेशलिसे भारतपाखें विद्युत् निर्यातया ऐतिहासिक सम्झौता पूवंगु व चीनलिसे रसुवागढी÷चिलिमे–जिलोंग÷केरुङ २२० केभी प्रसारण लाइन निर्माणया तयारी जुयाच्वंगु नं वय्कलं कनादिल ।

ऊर्जा भविष्य सुरक्षित, समावेशी व हरित दयेकेत दिर्घकालीन विद्युत् व्यापारयात हःपाः बिइगु क्षेत्रीय नीतिगत समन्वय, प्रसारण पूर्वाधारय् क्षेत्रीय लगानी नापं साझेदारी व पारदर्शी मूल्य निर्धारण नापं हरित वित्त प्रणालीपाखें ऊर्जा बजाःया विकास आवश्यक जूगु मन्त्री खड्कां धयादिल ।

नेपालं सन् २०३५ तक २८ द्वः व ५०० मेगावाट विद्युत् उत्पादन यायेगु व उकिइमध्ये १५ द्वः मेगावाट निर्यात यायेगु आज्जु कयातःगु वय्कलं कनादिल । अथे हे, सन् २०४५ तक शून्य कार्बन उत्सर्जन, सकसिगु नितिं स्वच्छ नसात्वँसा दयेकेगु ऊर्जा व विद्युतीय यातायात नापं उद्योग प्रणालीया विकास यायेगु प्रतिबद्धता मन्त्री खड्कां प्वंकादिल ।