अनुभव र जोशको संगम विदुर बस्नेत : उदयपुर–१ मा चुनाव जित्नेमा ढुक्क

नयाँ विकल्प संवाददाता
प्रकाशित मिती: २०८२ माघ २९, २१: २७

उदयपुर : प्रतिनिधि सभा निर्वाचन फागुन २१ मा उदयपुर क्षेत्र नम्बर १ बाट नेपाली कांग्रेसका उम्मेदवार बनेका विदुर बस्नेतले ७० वर्षको उमेरमा पनि चुनावी मैदानमा युवा उमेरका नेताहरूलाई चुनौती दिन सक्ने सक्रियता देखाएका छन्। घरदैलो अभियानमा उनीसँगै हिँड्ने युवाहरू थाक्ने भए पनि बस्नेत मतदातासँग संवादमा ताजगी र जोशका साथ प्रस्तुत हुन्छन्।

कांग्रेसका केन्द्रीय सदस्यसमेत रहेका बस्नेतले दुई कार्यकाल उदयपुर कांग्रेसको जिल्ला सभापति भएर नेतृत्व अनुभव सँगालेका छन्। राजनीतिक परिवारमा जन्मिएका उनी निस्कलंक छविका नेताका रूपमा परिचित छन्, जसका कारण विपक्षी दलका नेताहरूले समेत व्यक्तिगत रूपमा आलोचना गर्न सक्दैनन्।

उदयपुर–१ क्षेत्र कांग्रेसको परम्परागत प्रभाव क्षेत्र मानिन्छ। यसै क्षेत्रमा डा. नारायण खड्काले लगातार जित हात पारेका थिए। यही पृष्ठभूमिमा उम्मेदवार बनेका बस्नेत आफ्नो जितप्रति पूर्ण विश्वस्त देखिन्छन्। उनले भने, “चुनावमा उठ्ने त अरु पनि छन्, तर मेरो प्रतिस्पर्धा कसैसँग छैन।”

बस्नेतको चुनावी एजेन्डा स्थानीय समस्यामा केन्द्रित छ। उदयपुरमा बाढी र पहिरो दीर्घकालीन चुनौती भएको भन्दै उनले तटबन्ध निर्माणलाई प्राथमिकतामा राख्ने बताएका छन्। त्यसैगरी, डा. खड्काले सुरु गरेको उदयपुर विमानस्थलको निर्माण कार्यलाई पूर्णता दिन उनी प्रभावकारी पहल गर्ने प्रतिवद्धता व्यक्त गर्छन्।

पार्टीबारे कुरा गर्दै बस्नेतले नेपाली कांग्रेसलाई इतिहास बोकेको पुरानो पार्टी भए पनि नयाँ नेतृत्वबाट ऊर्जा प्राप्त गरेको संस्थाका रूपमा व्याख्या गरे। “विशेष महाधिवेशनपछि देशभर कांग्रेसप्रति नयाँ उत्साह देखिएको छ,” उनले बताए।

अनुभव र उत्साहको संयोजनका रूपमा उदयपुर–१ मा सक्रिय रहेका बस्नेत यसपटकको निर्वाचन सहज जितमा परिणत गर्ने तयारीमा देखिएका छन्।