टी-२० विश्वकप : नेपाल समूह चरणबाटै बाहिरियो, वेस्ट इन्डिज सुपर ८ मा – Naya Bikalpa
November 16, 2026, Monday      Epaper

टी-२० विश्वकप : नेपाल समूह चरणबाटै बाहिरियो, वेस्ट इन्डिज सुपर ८ मा

काठमाडौं : आइसिसी पुरुष टी-२० विश्वकप २०२६ अन्तर्गत समूह ‘सी’ को आफ्नो तेस्रो खेलमा वेस्ट इन्डिजसँग ९ विकेटले पराजित हुँदै नेपाल समूह चरणबाटै बाहिरिएको छ । लगातार तेस्रो हारसँगै नेपाल सुपर–८ को दौडबाट औपचारिक रूपमा बाहिरिएको हो ।

आइतबार भारतको मुम्बईस्थित वानखेडे रंगशालामा नेपालले दिएको १३४ रनको लक्ष्य वेस्ट इन्डिजले १५.२ ओभरमा मात्र एक विकेट गुमाएर पूरा गर्‍यो । यो जितसँगै लगातार तीन खेल जितेको वेस्ट इन्डिज सुपर-८ मा पुग्ने पहिलो टोली बनेको छ ।

वेस्ट इन्डिजका कप्तान शाइ होपले अविजित ६१ रनको अर्धशतकीय इनिङ खेले । उनले ४४ बलमा ५ चौका र ३ छक्का प्रहार गरे । शिमरन हेटमेयरले ३२ बलमा ४ चौका र २ छक्कासहित अविजित ४६ रन जोडे । दोस्रो विकेटका लागि होप र हेटमेयरबीच ९१ रनको अविजित साझेदारी भयो । ब्रान्डन किङ २२ रनमा आउट भएका थिए । नेपालका लागि नन्दन यादवले एक विकेट लिए ।

त्यसअघि टस हारेर पहिले ब्याटिङ गरेको नेपालले २० ओभरमा ८ विकेट गुमाएर १३३ रन बनाएको थियो । खराब सुरुवात गरे पनि उपकप्तान दीपेन्द्रसिंह ऐरीको अर्धशतकका कारण नेपालले सम्मानजनक स्कोर खडा गर्न सक्यो । दीपेन्द्रले ४७ बलमा ३ चौका र ३ छक्कासहित ५८ रन बनाए ।

दीपेन्द्र टी-२० विश्वकपमा नेपालका लागि अर्धशतक प्रहार गर्ने दोस्रो खेलाडी बनेका छन् । यसअघि सन् २०१४ मा सुवास खकुरेलले अफगानिस्तानविरुद्ध अर्धशतक प्रहार गरेका थिए ।

सोमपाल कामीले अविजित २६ रन जोड्दा लोकेश बमले १३ रन बनाए । गुल्सन झाले ११ तथा आसिफ शेखले ११ रन जोडे । नेपालले पावरप्ले (६ ओभर) मा ३ विकेट गुमाएर मात्र २२ रन बनाएको थियो, जुन टी-२० विश्वकपमा नेपालको सबैभन्दा कमजोर पावरप्ले स्कोर हो ।

बलिङतर्फ वेस्ट इन्डिजका जेसन होल्डरले ४ विकेट लिए । अकिल हुसेन, म्याथ्यु फोर्ड, सामर जोसेफ र रोस्टन चेसले समान एक–एक विकेट हात पारे ।

समूह ‘सी’ मा वेस्ट इन्डिज ६ अंकसहित शीर्ष स्थानमा छ । दुई जित र एक हारसहित इंग्ल्यान्ड ४ अंकसहित दोस्रो स्थानमा रहेको छ । स्कटल्यान्ड र इटली समान २ अंकका साथ क्रमशः तेस्रो र चौथो स्थानमा छन् । लगातार तीन हार बेहोरेको नेपाल अंकविहीन रहेको छ ।

अब नेपालले मंगलबार मुम्बईमै स्कटल्यान्डविरुद्ध समूहको अन्तिम खेल खेल्नेछ । उक्त खेल नेपालका लागि प्रतिष्ठाको लडाइँ मात्र हुनेछ ।

सम्बन्धित समाचार

समावेशिता र संघीयताले प्रजातन्त्रलाई बलियो बनाएको छ : गगन थापा
समावेशिता र संघीयताले प्रजातन्त्रलाई बलियो बनाएको छ : गगन थापा
  • २०८२ फाल्गुन ३, १४: ३५

वीरगञ्ज । नेपाली कांग्रेसका सभापति गगनकुमार थापाले मुलुक समावेशिता र संघीयताको अभ्यासमा गएपछि प्रजातन्त्र थप बलियो बनेको बताएका छन् ।...

भारत, चीन र इजरायलका लागि नवनियुक्त राजदूतले लिए पद तथा गोपनीयताको शपथ
भारत, चीन र इजरायलका लागि नवनियुक्त राजदूतले लिए पद तथा गोपनीयताको शपथ
  • २०८२ फाल्गुन ३, १४: ३५

काठमाडौं । राष्ट्रपति रामचन्द्र पौडेलसमक्ष तीन देशका लागि नवनियुक्त नेपाली राजदूतहरूले पद तथा गोपनीयताको शपथ लिएका छन्। राष्ट्रपति भवन शीतल...

उदाउँदो सूर्यलाई अर्घ दिँदै छठ पर्व सम्पन्न
उदाउँदो सूर्यलाई अर्घ दिँदै छठ पर्व सम्पन्न
  • २०८२ फाल्गुन ३, १४: ३५

काठमाडौँ । उदाउँदो सूर्यलाई अर्घ अर्पण गर्दै चार दिनसम्म श्रद्धा र भक्तिपूर्वक मनाइने छठ पर्व आज सम्पन्न हुँदैछ । पर्वको...