फर्नेस तेल खरिद विक्री खुल्ला गर्ने आयल निगमको निर्णय

नयाँ विकल्प,
काठमाडौं – नेपाल आयाल निगमले निजी क्षेत्रलाई समेत भारतीय बजारबाट फर्नेस तेल खरिद गरी नेपालमा बिक्री बितरण गर्न अनुमति दिने भएको छ ।

चार वर्ष अघि माग घटेको भन्दै रोकिएको फर्नेस आयलको बिक्री पुनः सुरु गरिएको नेपाल आयल निगमले जनाएको छ । व्यवसाय विविधिकरण गर्नका लागि फर्नेस तेल बिक्री सुरु गर्ने निर्णय गरिएको निगमले जनाएको छ ।

बजारमा यस्तो तेलको माग बढ्न थालेपछि निगमले निजी क्षेत्रलाई समेत फर्नेस आयल ल्याउन अनुमति दिने भएको हो । त्यस्ता निजी क्षेत्रले भारतको हल्दिया रिफाइनरी डिपो र मथुरा रिफाइनरी डिपोबाट खरिद आदेश (पीडिओ) पाएपछि ल्याउन सक्नेछन् ।

निगमले फर्नेस आयल खरिद गर्नको लागि प्रदेश नं १ को बिराटनगर, प्रदेश नं २ को अमलेखगञ्ज र बागमति प्रदेशस्थित निगमको केन्द्रीय कार्यालय काठमाडौंबाट खरिद अनुमति लिनु पर्नेछ ।
औद्योगिक प्रयोजनका लागि नेपालमा प्रयोग गरिदैं आएको फर्नेस तेलको नेपालमा विद्युत प्राधिकणले बढी खरिद गर्ने गरेको छ ।

निगमले पिडिओ दिएपछि यसको कारोबार गर्दै आएका व्यवसायीले खरिद बिक्री गर्न पाउने छन् । हालसम्म व्यवसायीले भारतीय आयल कर्पोरेसन (आईओसी) बाट सिधै खरिद गर्दै आएका थिए । अब भने निगमको अनुमतिपछि मात्र खरिद गर्न पाइन्छ ।

फर्नेस आयल डिजेलको तुलनामा धेरै सस्तो छ । डिजेल हाल प्रतिलिटर ९० रुपैयाँमा बिक्री हुँदै आएको छ, भने फर्नेस आयल प्रतिलिटर ६० रुपैयाँसम्म बिक्री हुन्छ । फर्नेस आयल बिक्रीको एकाधिकार निगममा आएपछि निजी क्षेत्रको कारोबार थप व्यवस्थित हुने निगमले जनाएको छ ।

फर्नेस तेलको मूल्य प्रति टन ५३ हजार ८ सय ३६ रुपैयाँ भनी निगमले निर्धारण गरेको छ ।
नेपाल विद्युद प्राधिकरण अन्तर्गतको मल्टी फ्युल पावर प्लान्ट बन्द भइ माग घटेपछि निगमले यसको बिक्री बितरण रोकेको थियो ।

निगमले फर्नेस तेल आर्थिक वर्ष ०७३–०७४ मा ३६ टन, ०७२–७३ मा ७७ टन,०७१–७२ मा आठ सय ८३ टन आयात गरेको थियो ।