संसदीय छानबिन समितिको माग सदन र सडकबाट गर्ने प्रतिपक्षी दलहरुको निष्कर्ष

नयाँ विकल्प राजनितिक व्यूराे
प्रकाशित मिती: २०८१ जेष्ठ ७, १७: २०

काठमाडौं । नेपाली कांग्रेसलगायत संघीय संसदका विपक्षी दलहरूले सदन र सडकबाट संयुक्त रूपमा सहकारी ठगी प्रकरणको विषयमा अध्ययन गर्न संसदीय छानबिन समिति गठनको माग गर्ने भएका छन्।

प्रधानमन्त्री पुष्पकमल दाहाल प्रचण्डले सोमबार दिउँसो संसदबाट विश्वासको मत लिएपछि बसेको विपक्षी दलहरूको बैठकले गृहमन्त्री रवी लामिछानेमाथि सहकारी घोटाला प्रकरणमा छानबिन गर्न संसदीय समिति गठनको मागलाई थप सशक्त रूपमा उठाउने निर्णय गरेको हो।

बैठकले प्रतिनिधि सभामा सभामुख देवराज घिमिरेले सोमबारको बैटठकमा खेलेको भूमिकामाथि प्रश्न उठाएको राष्ट्रिय प्रजातन्त्र पार्टीका प्रमुख सचेतक ज्ञानेन्द्र शाहीले जानकारी दिए।

‘आजको प्रतिनिधि सभामा सभामुख पार्टीका कार्यकर्ता जसरी प्रस्तुत हुनुभयो। उहाँले निष्पक्ष भूमिका निर्वाह गर्न सक्नुभएन भन्ने बैठकले निष्कर्ष निकालेको छ’ सांसद शाहीले भने।

नेपाली कांग्रेसको अगुवाईएमा भएको बैठकमा कांग्रेससहित, राप्रपा, जसपा नेपाल, लोसपा र राष्ट्रिय जनमोर्चाका नेताहरू उपस्थित थिए।