अब लार्के र याङग्री पनि काठमाडौंमा

नयाँ विकल्प
प्रकाशित मिती: २०७४ मंसिर १८, ०९: २२

काठमाडौं । मेलम्ची खानेपानी आयोजनाबाट काठमाडौं उपत्यकामा ५१ करोड लिटर पानी ल्याउने लक्ष्यका साथ याङ्ग्री र लार्केको पानी ल्याउने तयारी गरिएको छ । हाल निर्माण सम्पन्न हुने क्रममा रहेको आयोजनाबाट मात्रै ३२ लाख लिटर पानी दैनिक आउने अवस्था रहेको छ ।
उक्त क्षमताको मात्रै पानी काठमाडौंमा ल्याउँदा त्यसले काठमाडौं उपत्यकाको माग सम्बोधन गर्न नसक्ने भएकाले थप पानी ल्याउने उपायको खोजीमा लार्के र याङ्ग्रीको पानी ल्याउने तयारी गरिएको हो । आयोजनाले लार्के र याङ्ग्रीको पानी ल्याउने लक्ष्यका साथ परामर्शदाता छनोटको तयारी शुरु गरिसकेको छ ।
मेलम्ची खानेपानी विकास समितिले याङग्री र लार्के नदीको पानी काठमाडौं ल्याउने कामका लागि परामर्श दाता छनोट अघि बढाएको छ । आयोजना विकास समितिले ६ वटा कम्पनीलाई परामर्श सेवाका लागि प्रारम्भिक छनोटमा पारेको हो । यी कम्पनीहरुसँग प्राविधिक र वित्तीय प्रस्ताव माग गरिएको छ । आयोजनाले सार्वजनिक सूचना प्रकाशित गरेर पाँच वटा कम्पनीलाई तोकिएको मितिभित्रै वित्तीय र प्राविधिक प्रस्ताव पेश भनिएको हो ।

आयोजनाका इन्जिनियर रमाकान्त दुवाडीका अनुसार अहिले छनोट गरिएको परामर्शदाता कम्पनीले मेलम्ची खानेपानी आयोजनाको बाँकी काम र दोस्रो चरणमा अघि बढ्ने याङग्री र लार्के नदीको काममा परामर्श सेवा उपलब्ध गराउनेछ । आगामी जनवरीभित्र छनोट हुने एउटा परामर्शदाता कम्पनीले आगामी पाँच वर्षसम्म काम गर्ने भएको छ ।
आयोजनाको सुरुङ खन्नमात्रै ९५० मिटर बाँकी रहेको छ । आगामी एक महिनाभित्र आयोजनाको सुरुङ खन्ने कार्य सम्पन्न हुने छ । आगामी वैशाखमा काठमाडौंका धारामा पानी खसाल्ने तयारी गरिएको आयोजनाको तयारी रहेको छ । उपत्यकामा करिब ४५ किलोमिटर पाइप जडानको कार्य पनि अगाडि बढिरहेको छ ।