कीर्तिमानी आरोही आङरिता शेर्पाको निधन

नयाँ विकल्प
प्रकाशित मिती: २०७७ आश्विन ५, १३: २४

नयाँ विकल्प,
काठमाडौं – अक्सिजन बिना नै १० पटकसम्म विश्वको सर्वोच्च शिखर सगरमाथा आरोहण गर्ने कीर्तिमानी आरोही आङरिता शेर्पाको सोमबार निधन भएको छ ।

‘हिउँ चितुवा’ उपनामले चिनिएका आङरिता शेर्पाको विश्व विख्यात हिमआरोहीको रुपमा चर्चित छन् । जोरपाटीस्थित निवासमा ७५ वर्षको उमेरमा सोमबार बिहान १० बजे निधन भएको हो ।

सोलुखुम्बु जिल्लाको थामेमा जन्मिएका शेर्पाले सन् १९८३ (विसं२०४०) सालदेखि सगरमाथा आरोहण गर्न सुरु गरेका थिए । पर्वतारोही शेर्पा लामो समयदेखि बिरामी थिए । जेठा छोराको आरोहणकै क्रममा निधन भएपछि आङरित्ता निरास थिए ।

तीन वर्षअघि नसा सम्वन्धी समस्या देखिएपछि वाँसवारीस्थित न्युरो अस्पतालमा उपचार गराएका शेर्पाका त्यही समयदेखि बिरामी परेर थलिएका थिए । साधारण आर्थिक अवस्था भएका कारण २०७३ चैतमा उपचारका लागि आर्थिक सहयोग जुट्न नसक्दा समस्या भएको बताएका थिए ।

१० पटकसम्म अक्सिजनबिनै सगरमाथा आरोहण गर्ने शेर्पालाई तत्कालीन राजा वीरेन्द्र र त्यस बेलाको सरकारले थप स्वास्थ्य खराब हुने भन्दै पर्वतारोहणमा नजान सुझाव दिएपछि विश्राम लिएका थिए।